Sadiosan na Konsensia

SARONG aldaw mantang nagbibiahe pauli hale sa trabaho, nawara ni Charles, sarong empleyado sa sarong unibersidad sa Kenya, an saiyang cellular phone. Sa Kenya, mamahalon pa man giraray an mga bagay na ini.

“Dai ko inaasahan na may mabalik pa kaiyan,” an sabi ni Charles. Minsan siring, pakalihis nin pirang aldaw nasorpresa sia na makaresibi nin apod sa telepono hale sa sangang opisina kan Mga Saksi ni Jehova sa Kenya. Dai sia haros makatubod sa nadadangog nia na pinaduduman sia asin ipinakukua saiya an saiyang cell phone! Naaraman nia na an sarong bilog na panahon na ministro kan Mga Saksi ni Jehova nagsakay man sa linunadan ni Charles asin nakua an phone. Sa paghihingoang manompongan an kagsadiri, dinara kan ministro an phone sa sangang opisina, asin sa kahurihurihi nanompongan si Charles kan boluntaryong mga nagtatrabaho duman paagi sa pagsusog sa numerong naheling sa phone.

“Pinasasalamatan kong marhay an mga paghihingoang ginibo tanganing makontak ako apisar nang depisil iyan,” an sabi ni Charles sa saiyang surat sa sangang opisina. “Sinserong pinasasalamatan ko an mga miembro kan saindong organisasyon na nakakua kan cell phone, nagsusog tanganing makua ako, asin nagbalik kaiyan. Bako nang pasil na makakua nin sadiosan na tawo ngonyan, alagad nakaparirigon sa boot na igwa kita nin pira na napapalaen bilang tunay na mga Saksi ni Jehova Dios.”

An Mga Saksi ni Jehova sa gabos na lugar midbid sa pagkasadiosan ninda. Inaarog ninda si apostol Pablo, na nagsabi: “Kami nagtitiwala na kami igwa nin sadiosan na konsensia, mantang minamawot niamo na gumawe nin sadiosan sa gabos na bagay.” (Hebreo 13:18; 1 Corinto 11:1) Nasasabotan ninda na an arog kaiyan na gawe-gawe nagpapamuraway ki Jehova Dios, arog kan sabi ni Jesus: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.”​—Mateo 5:16.