‘Tinokdoan Nia Kami na Igalang an Saiyang Relihion’

NADISKOBRE nin saro sa Mga Saksi ni Jehova na taga probinsia nin Rovigo, Italia, na sia may tumor asin na grabe an saiyang kamugtakan. Pakatapos maospital nin nagkapirang beses, na durante kaiyan hinagad nia na bolongon sia na dai nin pag-ineksion nin dugo, inataman sia sa harong kan mga nars na hale sa lokal na serbisyo sa pag-ataman sa mga may kanser.

An makosog na pagtubod asin pagigin andam na makikooperar kan 36 anyos na pasyenteng ini hinangaan na marhay kan medikal na mga personahe na nagbolong sa saiya. Kan madali nang magadan sa kanser an pasyente, an saro sa mga nars na nag-ataman saiya nagsurat sa sarong magasin dapit sa pagigin nars manongod sa eksperyensia nia sa sarong pasyente na inapod niang Angela.

“Si Angela bibo asin determinadong mabuhay. Nasasabotan nia an saiyang kamugtakan asin an saiyang grabeng helang, asin arog kan gigibohon nin siisay man sa sato, naghahanap sia nin solusyon, nin remedyo, o bolong. . . . Kaming mga nars dikit-dikit niang nakamidbid. Dai nia sinayumahan an samong tabang. Al kontraryo, an pagigin prangka ni Angela nagpangyaring magin madali an gabos na bagay. Nakakawiling atamanon sia, huling aram mi na iyan panahon na makaolay an sarong sinserong tawo asin na makikinabang an saro sa saro. . . . Naaraman mi tolos-tolos na magigin olang an saiyang relihion sa pagbolong sa saiyang helang.” Iyan an saiyang opinyon huli ta naniniwala sia na maninigong ineksionan nin dugo si Angela, na sinayumahan kaini.​—Gibo 15:​28, 29.

“Bilang mga eksperto sa pag-ataman sa salud, sinabi mi ki Angela na dai kami oyon sa saiyang desisyon, alagad sa tabang nia, nasabotan mi kun gurano kahalaga sa saiya an buhay. Nasabotan mi man kun gurano kahalaga kan saiyang relihion para sa saiya sagkod sa saiyang pamilya. Si Angela dai nagsuko. Dai sia nagpadaog sa saiyang helang. Sia makosog. Gusto niang mabuhay, lumaban, asin magdanay na buhay. Ipinahayag nia an saiyang determinasyon, an saiyang pagtubod. Igwa sia nin determinasyon na sa parate mayo samo, nin pagtubod, na bakong siring karigon kan yaon samo. . . . Itinokdo samo ni Angela an halaga nin paggalang sa saiyang relihion, sarong bagay na napapalaen na marhay sa samong propesyonal na etika. . . . Naniniwala kami na an itinokdo samo ni Angela mahalagang marhay, huli ta napapaatubang kami sa gabos na klase nin tawo, gabos na klase nin kamugtakan, asin gabos na klase nin relihion, asin may manonodan kami asin ikakaalok sa siisay man na nakakaatubang niamo.”

Dangan itinampok kan artikulo sa magasin an Kodigo nin Propesyonal na Etika Para sa mga Nars na Italiano, na inaprobaran kan 1999, na nagsasabi: “Ginigibo kan nars an saiyang trabaho, na kinokonsiderar an relihioso, moral, asin kultural na mga prinsipyo sa buhay kan indibiduwal, siring man an saiyang rasa asin sekso.” Kun beses, tibaad masakit para sa mga doktor asin nars na igalang an makosog na relihiosong mga paniniwala kan pasyente, asin dai malilikayan nin saro na apresyaron an mga andam na gibohon iyan.

An mga desisyon na ginigibo kan Mga Saksi ni Jehova may labot sa saindang salud asin pagpabolong maingat na pinag-iisipan. Seryoso nindang kinokonsiderar an sinasabi kan Kasuratan, asin siring kan ipinapaheling sa kamugtakan ni Angela, bako sindang panatiko. (Filipos 4:5) Sa bilog na kinaban, nagdadakol an mga eksperto sa pag-ataman sa salud na andam na igalang an konsensia kan saindang mga pasyenteng Saksi.