Oras nin Pagkakan—Bako Sanang Panahon Tanganing Magkakan!
IKINAKAOGMA kan gabos an masiram na pagkakan. Idagdag pa sa karakanan an marahay na orolay asin mainit na pakikiasosyar kaiba kan mga tawong namomotan nindo, asin iyan nagigin sarong nakakaogmang marhay na okasyon na napapanigoan bako sanang an satong pagkagutom. Nagigin ugale na kan dakol na pamilya na magtiripontipon kisuerra sarong beses kada aldaw tangani na iribang magkakan. An oras nin pagkakan nagtatao sa pamilya nin oportunidad na pag-olayan an mga aktibidad o plano kan aldaw. An mga magurang na naghihinanyog sa mga komento asin ipinapahayag kan saindang mga aki nagkakaigwa nin kadikit na ideya kun ano an iniisip asin saboot kan saindang mga aki. Sa pag-agi nin panahon, an maogma, relaks na pag-iribaiba sa oras nin pagkakan nagpapatalubo sa laog nin pamilya nin pakamate nin seguridad, pagtitiwala, asin pagkamoot na nakakadugang nin karigonan sa pamilya.
Ngonyan, huli ta dakol na miembro nin pamilya an sibot asin pirmeng okupado, depisil para sainda na mag-iribanan sa pagkakan. Sa nagkapirang parte kan kinaban, dai inooyonan kan lokal na kultura an pamilya na iribang nagkakarakan o nag-oorolay pa ngani sa oras nin pagkakan. An ibang pamilya ugale nang buksan an TV kun nagkakarakan, na epektibong hinahale sa sainda an ano man na oportunidad na magkaigwa nin makahulogan na komunikasyon.
Minsan siring, an Kristianong mga magurang pirmeng listo sa mga oportunidad na pakosogon an saindang kasararo sa harong. (Talinhaga 24:27) Kaidtong haloy nang panahon, sinabihan an mga magurang na an saro sa pinakamarahay na oportunidad tanganing ikakomunikar sa saindang mga aki an tataramon nin Dios iyo na ‘kun sinda nagtutukaw sa saindang harong.’ (Deuteronomio 6:7) An regular na pagtukaw nin iriba tanganing magkakan nagtatao sa mga magurang nin daing kaagid na oportunidad na itadom sa mga aki ninda an mas hararom na pagkamoot ki Jehova asin an saiyang matanos na mga prinsipyo. Paagi sa pagkultibar nin sarong maogma asin relaks na kamugtakan, puede nindong gibohon na nakakaogma asin nakakapakosog na eksperyensia an oras nin pagkakan para man sa pamilya nindo. Iyo, gibohon an oras nin pagkakan na bako sanang panahon tanganing magkakan!