An Marahay na Gawe-Gawe ‘Nagsasamno sa Katokdoan nin Dios’
AN HOBEN na si Maria na taga Kransnoyarsk, Rusya, magayonon magkanta kaya ibinale sia kan saiyang maestra sa koro kan eskuelahan. Dai nahaloy pakatapos kaiyan, magalang na dinolok ni Maria an saro sa saiyang mga maestra tanganing ipaliwanag na dai nia puedeng kantahon an nagkapirang awit. Taano man? Huli ta an pagkanta nin mga awit na may relihiosong konotasyon kontra sa saiyang kombiksion na basado sa Biblia. Huling nabigla, an maestra nag-isip-isip, ‘Ano an sala sa pagpamuraway sa Dios paagi sa sarong awit?’
Tanganing ipaheling kun taano ta dai sia makanta nin awit manongod sa sarong Trinitaryong Dios, binuklat ni Maria an saiyang Biblia asin ipinaliwanag na an Dios asin si Jesu-Cristo bakong sarong Dios asin na an banal na espiritu iyo an puersa aktiba nin Dios. (Mateo 26:39; Juan 14:28; Gibo 4:31) Isinaysay ni Maria: “Dai man naapektaran an sakong relasyon sa maestra. Sa kabilogan, marahayon an samong mga maestra sa samong eskuelahan. Gusto ninda na magin onesto kami sa samong sadiri.”
Sa bilog na taon nin pag-eskuela, nakua ni Maria an paggalang pareho kan mga maestra asin kaklase huli sa saiyang paninindogan. Si Maria nagsasabi: “An mga prinsipyo sa Biblia nakakatabang sako sa sakong buhay. Sa katapusan kan taon nin pag-eskuela, nakaresibi ako nin premyo para sa pagkaonesto asin pagkaareglado, mantang an sakong mga magurang nakaresibi nin opisyal na surat nin pagpapasalamat hale sa eskuelahan huli sa marahay na pagpadakula sa saindang aki.”
Nabautismohan si Maria kan Agosto 18, 2001. An sabi nia: “Naoogma ako na nakakapaglingkod ako sa marahayon na Dios na arog ni Jehova!” An hoben na mga Saksi ni Jehova sa bilog na kinaban inootob an mga tataramon sa Tito 2:10, kun saen mababasa niato: ‘Samnohan nindo an katokdoan kan satong Paraligtas, an Dios, sa gabos na bagay.’
[Ritrato sa pahina 32]
Surat nin apresasyon asin sertipiko nin merito
[Ritrato sa pahina 32]
Si Maria asin an saiyang mga magurang pakatapos kan saiyang bautismo