‘Kaagid sa Mahalagang Pulang Gapo’

SI APOSTOL Juan nagkaigwa nin bisyon nin sarong mamuraway na trono sa langit. An Saro na nakatukaw sa trono “kaagid sa sarong gapong jaspe.” Sia kaagid man sa “mahalagang pulang gapo.” (Kapahayagan 4:​2, 3) Anong mga gapo ini?

Bako ining mga gapo na dai natataros nin liwanag na nagkikinang sa ibabaw kaiyan. Kan suanoy na mga panahon, an termino sa Griego na trinadusir na “jaspe” ginamit sa pagpanongod sa mga gapo na laen-laen an kolor, kaiba an mahalagang marhay na mga mutya na silag. An “gapong jaspe” sa Kapahayagan 4:3 “bako nanggad an baratong jaspe niato sa presenteng panahon,” an sabi ni A. T. Robertson sa Word Pictures in the New Testament. Dugang pa, sa huring kabtang kan libro nin Kapahayagan, ilinadawan ni Juan an langitnon na siudad, an Jerusalem, na nagsasabi: “An liwanag kaiyan nakakabaing sa pinakamahalagang gapo, siring sa gapong jaspe na malinaw siring sa kristal.” (Kapahayagan 21:​10, 11) An mga gapo na sinasabi ni Juan minalataw na silag, na natataros nin liwanag.

An saro na irinerepresentar bilang nakatukaw sa trono sa bisyon ni Juan iyo an pinakamamuraway na Persona sa uniberso, si Jehova Dios. Sia dalisay asin banal sa pinakahalangkaw na sokol. Kaoyon kaiyan, isinurat ni apostol Juan: “An Dios liwanag asin dian sa saiya dai nin ano man na kadikloman.” (1 Juan 1:5) Huli kaini, sinadol ni Juan an saiyang mga kapagtubod na ‘dalisayon an sadiri ninda kun paanong si Jehova dalisay.’​—1 Juan 3:3.

Ano an dapat niatong gibohon tanganing mansayon kita nin Dios bilang dalisay? Mahalagang marhay nanggad an pagkaigwa niato nin pagtubod sa pinabolos na dugo ni Cristo para sa kapatawadan kan satong mga kasalan. Kaipuhan man na padagos kitang ‘maglakaw sa liwanag’ paagi sa regular na pag-adal sa Biblia asin pamumuhay na kaoyon kan mga katokdoan kaiyan.​—1 Juan 1:7.