Sarong Mapakumbabang Aprikano na Namomoot sa Tataramon nin Dios

AN MGA bisita sa Aprika nasosorpresa sa parate na pasil na marhay palan makapoon nin pakikipag-olay sa lokal na mga tawo dapit sa mga topiko sa Biblia. Naghihinanyog tolos an mga tawo sa mga hapot na siring kan, “Ano an Kahadean nin Dios?” o “Igwa daw nin nagdadanay na solusyon sa mga problema na arog kan kakulangan nin kakanon, helang, guerra, asin krimen?” Dakol an maoogmang togotan an sarong estranghero na ipaheling sa sainda an mga simbag sa Biblia. Sa parate minaresulta ini sa regular na pag-adal sa Biblia. Asin mantang an mga inaadalan nag-ooswag sa espirituwal, sinda nagigin bautisadong mga Kristiano.

An saro sa enot na mga Aprikano na naghimate nin arog kaiyan iyo an nasambitan sa Biblia sa Gibo 8:26-40. Sia sarong Etiope na nagbiahe pa-Jerusalem tanganing sumamba sa tunay na Dios, si Jehova.

Siring kan ipinapaheling sa retrato sa ibaba, papuli na an Etiope sakay sa saiyang karuwahe, na nagbabasa sa nakabukas na balumbon. Ruminani sa saiya an sarong estranghero asin naghapot: “Ano talagang aram mo an binabasa mo?” Mapakumbabang inadmitir kan Etiope na kaipuhan nia an tabang asin nakimaherak sa estranghero, an Kristianong ebanghelisador na si Felipe, na sumakay sa karuwahe. Dangan hinagad nia ki Felipe na ipaliwanag an kahulogan kan teksto sa Kasuratan na binasa pa sana nia. Ipinaliwanag ni Felipe na iyan sarong hula may koneksion sa dai pa sana nahahaloy na pagkagadan kan Mesiyas, si Jesu-Cristo. Isinaysay man ni Felipe an iba pang bagay may labot sa “maogmang bareta manongod ki Jesus,” na daing duda na kaiba an pagkabuhay liwat ni Jesus.

Kan madangog an makangangalas na mga katotoohan na ini, gusto kan Etiope na magin disipulo ni Jesus asin naghapot: “Ano an nakakaolang sako na mabautismohan?” Kasunod kan saiyang bautismo, an mapakumbabang Aprikanong ini nagpuli na maogma, asin an Biblia mayo nang sinambit pa dapit saiya.

Ngonyan, an Mga Saksi ni Jehova nagtatabang sa minilyon na tawo sa bilog na kinaban tanganing makanood manongod sa iyo man sanang “maogmang bareta.” Mga anom na milyon na daing bayad na pag-adal sa Biblia an ginigibo sa presente.