Kamo daw Arog nin Poon nin Lagani Auna?

SA SARONG baryo sa luwas kan Port Moresby, Papua New Guinea, papuli na an duwang ministro hale sa saindang paghuhulit. Mantang sinda naglalakaw, nakaheling sinda nin magayon na kahoy. “A, lagani auna!” an sabi kan mas may edad na lalaki. Kinakaolay an mas nguhod na lalaki, sia nagpadagos: “An ngaran na iyan nangangahulogan ‘taonan na kahoy.’ Bakong arog nin dakol na ibang kahoy sa tropiko, kada taon nararakdag an mga dahon kaiyan asin garo gadan na iyan. Minsan siring, kun tig-oran na, iyan nabubuhay giraray, minaburak, asin nagigin magayon na naman.”

May leksion na manonodan sa lagani auna, o royal poinciana, na apod dian kan kadaklan. Oyon sa nagkapirang eksperto, kabilang iyan sa limang pinakamagayon na kahoy na namumurak sa kinaban. Minsan ngani nararakdag an mga burak asin dahon kaiyan sa panahon nin tigmara, an kahoy na iyan nagsasaray nin suplay nin tubig. An mga gamot kaiyan pusog asin kayang tumubo sa palibot nin darakulang gapo sa irarom kan daga. Paagi kaini, makosog an pagkakapot kaiyan tumang sa makokosog na doros. Sa halipot, iyan nabubuhay paagi sa pag-adaptar sa masakit na mga kamugtakan.

Tibaad kita nasa kamugtakan na minabalo sa kualidad kan satong pagtubod. Ano an makakatabang sa sato na makatagal? Arog kan lagani auna, puede kitang uminom asin magsaray nin tubig na nagtatao nin buhay hale sa Tataramon nin Dios. Maninigo man na mangapot kita nin higot sa ‘satong gapo,’ si Jehova, saka sa saiyang organisasyon. (2 Samuel 22:3) Totoo nanggad, an lagani auna sarong magayon na pagirumdom na dawa sa masakit na kamugtakan, mapapagdanay niato an satong espirituwal na kosog asin gayon kun aaprobetsaran niato an mga probisyon na itinatao ni Jehova. Paagi sa paggibo kaiyan, ‘mamanahon niato an mga panuga’ nia, kaiba an panuga na buhay na daing katapusan.​—Hebreo 6:12; Kapahayagan 21:4.