Mga Hapot Hale sa mga Parabasa

Paano niato dapat saboton an mga tataramon ni Pablo na an sarong babaeng balo dapat na “agom na babae nin sarong agom na lalaki” tangani na magin kualipikadong umako nin tabang hale sa Kristianong kongregasyon?—1 Timoteo 5:9.

Huling si apostol Pablo nagtataram manongod sa sarong babaeng balo, an pananaram na “agom na babae nin sarong agom na lalaki” siertong malinaw na nanonongod sa saiyang situwasyon bago sia nabalo. Nangangahulogan daw ini na an babaeng balo dapat na sarong beses sanang nagkaigwa nin agom? O an mga tataramon daw ni Pablo posibleng nangangahulogan nin iba pang bagay?a

Isinusuherir kan nagkapira na si Pablo nagtataram manongod sa mga babaeng balo na sarong beses sanang nagkaigwa nin agom. Totoo na sa dakol na kultura asin sosyedad, an sarong babaeng balo na nagdadanay na daing agom ibinibilang na espesyalmenteng kaomaw-omaw. Minsan siring, an punto de vistang iyan sarongat sa ibang mga tataramon ni Pablo. Halimbawa, sa mga Kristiano sa Corinto, lininaw nia na minsan ngani sa paghona nia magigin mas maogma an sarong babaeng balo kun sia magdadanay na daing agom, “sia libre nang magpakasal sa siisay man na boot nia, sanang dian sa Kagurangnan.” (1 Corinto 7:39, 40; Roma 7:2, 3) Dugang pa, sa saiyang surat ki Timoteo, si Pablo nagsabi: “Minamawot ko na an mga babaeng balo na hoben pa magpaagom.” (1 Timoteo 5:14) Sa siring, dai magkakaigwa nin katuyawan an sarong babaeng balo kun pilion niang mag-agom giraray.

Kun siring, paano niato maninigong saboton an mga tataramon ni Pablo ki Timoteo? An pananaram na “agom na babae nin sarong agom na lalaki” sa bersikulo sanang ini minalataw. Sa orihinal na lenguahe, iyan literal na nangangahulogan na “babae nin sarong lalaki.” Interesante nanggad, an pananaram na ini kaagid kan ginamit ni Pablo nin nagkapirang beses sa saiyang mga isinurat, arin na baga, “agom na lalaki nin sarong agom na babae,” o “lalaki nin sarong babae” sa orihinal na lenguahe. (1 Timoteo 3:2, 12; Tito 1:6) Ginamit ni Pablo an huring pananaram kan ilinista nia an mga kualipikasyon para sa Kristianong mga paraataman asin ministeryal na lingkod. Sa kontekstong iyan, sa pangenot an pananaram nangangahulogan na tanganing makualipikar para sa paninimbagan sa Kristianong kongregasyon, an sarong lalaki, kun may agom, dapat na magin maimbod sa saiyang agom asin mayo nin katuyawan sa moral.b Mantang siring kaiyan, an pananaram sa 1 Timoteo 5:9 minalataw na nag-aapod nin atension sa iyo man sanang punto: Tanganing makualipikar an sarong babaeng balo para sa tabang hale sa kongregasyon, sia dapat na nagin dusay asin maimbod na agom sa saiyang agom na lalaki kan ini buhay pa asin dapat na daing katuyawan sa moral. An dugang pang mga kahagadan na ilinista ni Pablo gabos nagtotokdo sa siring nanggad kaiyan na tawo.—1 Timoteo 5:10.

[Mga Nota sa Ibaba]