Pagpasyar sa Pambihirang Imprentahan
AN MAGASIN na binabasa mo tibaad bako an kaenot-enoteng isyu kan An Torrengbantayan asin Awake! na naheling mo. Tibaad an mga Saksi ni Jehova nagdalaw na sa saindong harong asin nag-alok kan mga magasin na iyan tanganing tabangan kamo na mas masabotan an Biblia. O tibaad naheling na nindo an mga Saksi na nag-aalok nin siring na mga babasahon sa Biblia sa tinampo o sa sadan sa lugar nindo. Sa katunayan, an bulanan na sirkulasyon kan magasin na ini labi sa 35 milyones, na iyo an pinakamahiwas na ipinupublikar na relihiosong magasin sa kinaban.
Pero, napag-isip-isip na daw nindo kun saen asin kun paano ginigibo an gabos na babasahon na ini? Tanganing masimbag iyan, helingon niato an saro sana sa dakol na imprentahan na ginagamit kan Mga Saksi ni Jehova sa manlaenlaen na nasyon—an yaon sa Wallkill, Nueva York, E.U.A. Dakol sa mga parabasa niato sa bilog na kinaban an dai basta makakabiahe tanganing magpasyar sa imprentahan na ginagamit kan Mga Saksi ni Jehova sa Estados Unidos, kaya tibaad an pinakamarahay iyo an pagpasyar paagi sa pagbasa asin pagheling sa mga retrato.
Siempre, an pag-imprenta nagpopoon sa mga isinurat na materyal. An Graphics Department nagreresibi nin materyal na iimprentahon na nasa mga electronic file hale sa Writing Department sa Brooklyn, Nueva York. An mga file na ini an ginagamit sa paggibo nin mga printing plate. Sa Wallkill, kada bulan mga 1,400 na rolyo nin papel an minaabot sa imprentahan, na naggagamit nin mga 80 sagkod 100 na toneladang papel kada aldaw. An mga rolyo—na an nagkapira may timbang na labing 1,300 kilos—ibinubugtak sa limang offset press. An papel iniimprentahan, pinuputol, asin tinitiklop na magin tigta-32 na pahinang seksion na inaapod na mga signature. An magasin na binabasa mo sarong signature. Kumusta an mga libro? Sa gibohan nin mga libro, an mga signature na ini pinag-iiriba tanganing magin sarong libro. An saro sa duwang gibohan nin libro nakakagibo sa sarong aldaw nin 50,000 na libro na matagas an cover o 75,000 na libro na malumoy an cover. An saro pang gibohan nin libro puedeng makagibo sa sarong aldaw nin mga 100,000 na libro na malumoy an cover.
Durante kan 2008, an imprentahan na ini nakagibo nin labi nanggad sa 28,000,000 na libro, na an labing 2.6 milyones kaiyan mga Biblia. Kan taon man na iyan, 243,317,564 magasin an nagibo. An imprentahan nag-iistak nin siring na mga babasahon sa Biblia sa mga 380 lenguahe. Pagkatapos na magibo an mga babasahon, ano na an masunod?
An imprentahan nakakaresibi nin mga order hale sa 12,754 kongregasyon kan Mga Saksi ni Jehova sa kontinental na Estados Unidos asin 1,369 sa Caribbean asin Hawaii. An Shipping Department an nag-iimpake kan gabos na inorder na babasahon asin nag-aareglo kan pagpadara kaiyan sa tamang mga adres. Kada taon, mga 14 milyones na kilong babasahon an ipinapadara sa mga kongregasyon sa Estados Unidos.
An pinakaimportanteng kabtang kan imprentahan na ini bako an mga makina kundi an mga tawo. Labing 300 an nagtatrabaho sa mga departamento kan imprentahan—Graphics, Scheduling, Pressroom, Bindery, asin Shipping Department. An edad kan mga trabahador poon 19 sagkod 92—na gabos boluntaryo na mayo nin suweldo.
Sinda interesadong marhay sa mga tawo—an mga indibiduwal na maogmang makakaresibi kan mga babasahon na ini asin matotokdoan, mapaparigon an boot, asin magigiyahan kan mga prinsipyo sa Biblia na tinotokar dian. Naglalaom kami na kabilang kamo sa siring na mga parabasa asin na an mga babasahon na iniimprenta digdi nakakatabang sa saindo na padagos na magkua nin kaaraman manongod ki Jehova Dios asin ki Jesu-Cristo, na nangangahulogan nin buhay na daing katapusan.—Juan 17:3.
[Mga Ritrato sa pahina 16]
[Bilog na pahinang ritrato sa pahina 17]