Taano ta Binabautismohan an mga Kristiano?

Sinisimbag sa artikulong ini an mga bagay na tibaad ihinahapot mo asin ipinapaheling man kun saen mo iyan mababasa sa saimong Biblia. Maoogma an mga Saksi ni Jehova na ipakipag-olay sa saimo an mga simbag na ini.

1. Ano an boot sabihon kan Kristianong bautismo?

An bautismo paghagad nin marahay na relasyon sa Dios. Kaya, an sarong Kristiano dapat bautismohan, bakong kun omboy pa, kundi kun sia nasa edad na tanganing makanood dapit sa Dios asin magin disipulo ni Jesus. (Guibo 8:12; 1 Pedro 3:21) Kita nagigin disipulo ni Jesus kun kita nakakanood asin naggigibo kan mga ipinagboot nia.​—Basahon an Mateo 28:​19, 20.

Kan panahon kan mga apostol ni Jesus, dakol an huminiro tolos tanganing makanood dapit sa Dios asin ki Jesus. Halimbawa, kan manodan nin sarong lalaki na an kagadanan ni Jesus nagbukas kan dalan para sa kaligtasan, sia tolos-tolos na nagin disipulo. Ngonyan, dakol na sinsero an nagdedesisyon na magin parasunod ni Jesus.​—Basahon an Guibo 8:​26-31, 35-38.

2. Taano ta binautismohan si Jesus?

Si Jesus mga 30 anyos kan ilubog sia ni Juan na Bautisador sa Salog nin Jordan. An bautismo ni Jesus nagrerepresentar sa desisyon nia na gibohon an kabotan nin Dios para sa saiya. (Hebreo 10:7) Kaiba digdi an pagtao nia kan saiyang buhay bilang atang para sa mga kasalan nin katawohan. Dawa bago pa sia buminaba hale sa langit tanganing mabuhay digdi sa daga, pirme nang namomotan asin sinusunod ni Jesus an saiyang Ama, si Jehova.​—Basahon an Marcos 1:​9-11; Juan 8:29; 17:5.

3. Taano ta dapat bautismohan an sarong Kristiano?

An situwasyon niato iba ki Jesus​—namundag kita na nagkakasala. Pero, huli sa kagadanan ni Jesus bilang atang, nagin posible na kita magkaigwa nin marahay na relasyon sa Dios. (Roma 5:​10, 12; 12:​1, 2) Sa katunayan, kita posibleng magin miembro kan saiyang pamilya. (2 Corinto 6:18) Paano kita magkakaigwa kan pribilehiong iyan? Sa pribadong pamibi, idinudusay niato an sadiri ki Jehova, na nanunuga na gigibohon an kabotan nia sagkod na kita nabubuhay. Pagkatapos na magdusay, kita nagpapabautismo sa atubangan kan publiko bilang simbolo kaiyan.​—Basahon an Mateo 16:24; 1 Pedro 4:2.

4. Paano ka makakapag-andam para sa bautismo?

Tinotokdoan kan mga Saksi ni Jehova sa Biblia an siisay man na gustong rumani sa Dios. An pag-adal sa Biblia asin pag-atender sa Kristianong mga pagtiripon magpapakosog kan pagkamoot asin pagtubod mo sa Dios. Tatabangan ka man kaiyan na pataluboon an positibong mga atitud asin ugale. An pagpatalubo nin pagkamoot, pagtubod, asin iba pang maka-Dios na mga kualidad makakatabang sa saimo na otobon an panuga mo na maglingkod ki Jehova sagkod lamang.​—Basahon an Juan 17:3; Hebreo 10:​24, 25.

Para sa dugang pang impormasyon, helingon an kapitulo 18 kan librong ini, Ano Man Nanggad an Itinotokdo kan Biblia? na ipinublikar kan Mga Saksi ni Jehova.