Hapot Hale sa mga Parabasa
Paano masasabi na an kagadanan kan mga maimbod sa Dios ‘mahalaga nanggad sa mga mata ni Jehova’?
▪ An pinasabngan na salmista nag-awit: ‘Mahalaga nanggad sa mga mata ni Jehova an kagadanan nin saiyang mga banal.’ (Sal. 116:15) An buhay nin lambang tunay na parasamba ni Jehova mahalagang marhay sa saiya. Minsan siring, labi pa sa kagadanan nin sarong indibiduwal an kahulogan kan mga tataramon sa Salmo 116 na kinotar pa sana.
Sa pahayag para sa sarong Kristiano na nagadan, bakong angay na iaplikar sa nagadan an Salmo 116:15, dawa ngani nagadan siang maimbod ki Jehova. Taano? Huling an tataramon kan salmista igwa nin mas mahiwas na kahulogan. Nangangahulogan iyan na para sa Dios dakulaon na bagay an kagadanan kan bilog na grupo nin mga maimbod sa saiya kaya dai sia matogot na mangyari iyan.—Hilingon an Salmo 72:14; 116:8.
Sinisierto sa sato kan Salmo 116:15 na dai totogotan ni Jehova na an maimbod na mga lingkod nia, bilang grupo, biyong mapara sa daga. Sa katunayan, an kasaysayan niato sa presenteng panahon nagpapahiling kan satong pakatagal sa grabeng mga pagbalo asin persekusyon, na sa siring malinaw na nagpapatunay na nungkang totogotan nin Dios na mapoho kita.
Huli sa saiyang daing limitasyon na kapangyarihan asin dai nasusudyang katuyohan, dai totogotan ni Jehova na malaglag kita bilang grupo. Kun totogotan iyan nin Dios, garo baga mas makapangyarihan an mga kaiwal nia kisa sa saiya—na imposible nanggad! Minalataw na an katuyohan ni Jehova na an dagang ini magin istaran kan mga tawong maimbod sa saiya dai maootob—asin imposible iyan. (Isa. 45:18; 55:10, 11) Dawa an sagradong paglilingkod ki Jehova mapopondo sa daga kun mayo nin mga tawong matatada na masamba sa saiya sa daganon na mga patyo kan saiyang dakulang espirituwal na templo! Mayo nin magigin pundasyon para sa “bagong daga”—an matanos na sosyedad nin tawo na nabubuhay sa kinaban na ini sa irarom kan ‘bagong langit.’ (Kap. 21:1) Dangan an Sangribong Taon na Paghade ni Cristo dai man magigin totoo kun mayo nin daganon na mga sakop.—Kap. 20:4, 5.
Magigin kuestionable an posisyon asin reputasyon nin Dios kun totogotan nia an saiyang mga kaiwal na pohoon an saiyang bilog na banwaan digdi sa daga. Magigin digta iyan sa posisyon ni Jehova bilang Unibersal na Soberano. Apuera kaini, huli sa paggalang nia sa saiyang sadiri asin sa banal na ngaran nia, dai totogotan ni Jehova an kagadanan kan mga maimbod sa saiya bilang grupo. Asin isip-isipa ini: Huling mayo nin ano man na inhustisya sa Dios, pirme niang iingatan an grupo nin mga tawo na maimbod na naglilingkod sa saiya. (Deut. 32:4; Gen. 18:25) Dugang pa, an pagtogot na mapoho an mga lingkod nia bilang grupo magigin kontra sa Tataramon nin Dios: ‘Si Jehova dai mapabaya sa saiyang banwaan huli kan saiyang dakulang ngaran.’ (1 Sam. 12:22) Tunay nanggad, “dai pababayaan [ni Jehova] an saiyang banwaan, an sadiri niyang pamana dai niya tatalikodan.”—Sal. 94:14, An Marahay na Bareta Biblia.
Nakakaranga nanggad na maaraman na nungkang mapapara sa daga an banwaan ni Jehova! Kun siring, pirme nanggad kitang magin maimbod sa Dios, na nagtitiwala sa panuga nia: “Ano man na armas na gigibohon tumang sa saimo dai magkakaepekto, asin kokondenaron mo an arin man na dila na matumang sa saimo sa paghokom. Iyo ini an minanang rogaring kan mga lingkod ni Jehova, asin gikan sa sako an saindang katanosan.”—Isa. 54:17, NW.
[Blurb sa pahina 22]
Nungkang totogotan nin Dios na mapoho an saiyang banwaan