An Kabootan Nakakahale nin Raot nin Boot
AN SARONG may edad nang babae nagin antipatika ki George asin Manon, duwang Saksing taga Netherlands, kan sabihon ninda sa saiya an maogmang bareta kan Kahadean. Naaraman ninda na duwang beses na siang nabálo asin nagadanan pa nin aking lalaki patin nagsasakit huli sa grabeng artritis. Minsan ngani medyo kuminalma sia kan nag-oolay sinda, dai talaga sia nagin makikatood.
Minsan siring, isinuherir ni George ki Manon na magbuelta sinda asin darahan nin bukey an babae huling garo mamondoon ini asin makolog an boot. Kan gibohon ninda iyan, nasorpresa an kagharong na si Rie. Pero bakong kombenyente an oras na iyan para sa saiya, kaya iinareglo na magbuelta sinda sa ibang aldaw. Mayong tawo kan magbuelta si George asin Manon sa iinareglong oras. Minsan ngani prinobaran ninda sa iba-ibang aldaw, dai ninda sia naaabotan. Inisip pa ngani ninda na tinatagoan nia sinda.
Sarong aldaw, naabotan man giraray ni George si Rie sa harong kaini. Naghagad sia nin dispensa na dai nia naotob an napag-olayan ninda asin nagpaliwanag na naospital sia. “Alagad dai ka gayod matubod kun ano an ginibo ko pagkahale nindo,” an sabi nia. “Pinonan kong basahon an Biblia!” Magayon an nagin pag-oolay ninda, asin naponan an pag-adal sa Biblia.
Sa pag-adal nia kan Biblia, si Rie, na dati grabe an raot nin boot, nagin nang maogma asin maboot. Minsan ngani dai makahale sa harong, pinonan nia tolos na sabihon sa siisay man na nagdadalaw sa saiya an bagong pagtubod nia. Huli sa saiyang salud, dai sia nakakaatender nin regular sa Kristianong mga pagtiripon, pero ikinakaogma niang marhay an pagdalaw sa saiya kan mga kapagtubod nia. Kan aldaw na sia mag-82 anyos na, nag-atender sia sa pansirkitong asamblea asin nabautismohan bilang simbolo kan saiyang pagdusay sa Dios.
Nagkapirang bulan sana pagkagadan nia, nakua an sarong tulâ na isinurat nia. Duman ilinadawan nia an kapungawan nin paggurang asin idinoon an halaga nin kabootan. “Talagang napahiro ako kan mabasa ko an tuláng iyan,” an sabi ni Manon, “asin naoogma akong marhay na tinabangan kami ni Jehova na magpahiling sa saiya nin kabootan.”
Iyo, an personal na halimbawa ni Jehova nagpapahiro sa sato na magpahiling nin siring na pagkamoot asin kabootan. (Efe. 5:1, 2) Magigin mabunga an satong ministeryo mantang ‘irinerekomendar niato an satong sadiri bilang mga ministro nin Dios paagi sa kabootan.’—2 Cor. 6:4, 6, NW.