Pagbiahe Kaiba kan mga Pilgrim

“DAI ko talaga kayang magharongharong!” Dakol nanggad na bagong tinotokdoan sa Biblia an nakamate kan siring kun iniisip ninda na maghuhulit sinda sa mga dai kamidbid! Pero, an nagsabi kan pagsayumang ini eksperyensiadong ispiker sa publiko asin paratokdo sa Biblia na inaapod na pilgrim.

An dakol na parabasa kan Zion’s Watch Tower, na huminale sa relihion ninda, gustong makiibaiba sa mga napapaha man sa katotoohan sa Biblia. Sinadol kan magasin na iyan an mga parabasa na hanapon an iba na igwa man kan mahalagang marhay na pagtubod asin regular na magtiripon tanganing mag-adal nin Biblia. Poon kan mga 1894, nagpadara an Watch Tower Society nin nagbibiaheng mga representante tanganing dalawon an mga grupong naghahagad na bisitahon sinda. An eksperyensiado asin maigot na mga lalaking ini, na kan huri inapod na mga pilgrim, pinipili huli sa saindang kahoyoan, kaaraman sa Biblia, abilidad sa pagpahayag saka pagtotokdo, asin kaimbodan sa pantubos. Sa parate, an pagbisita minalawig sana nin saro o duwang aldaw na pano nin aktibidad. Dakol na Estudyante sa Biblia an enot na nakaeksperyensiang maglingkod sa langtad paagi sa pagdistribwir nin mga handbill para sa pampublikong pahayag nin pilgrim. Pagkatapos kan pambangging diskurso nia sa sarong eskuelahan, sinimbag ni Hugo Riemer, na kan huri nagin miembro kan Namamahalang Grupo, an mga hapot sa Biblia sagkod na lampas nang matanga. Pagal sia pero maogma, asin sinabi nia na an pagtiripon “magayon.”

Sinabi kan The Watch Tower na an “pangenot na katuyohan” kan pagdalaw nin pilgrim iyo na pakosogon “an mga kapagtubod” paagi sa mga pagtiripon sa harong nin mga nagtutubod. An mga Estudyante sa Biblia na hale sa mga lugar sa palibot minaarabot para sa mga pahayag asin hapot-simbagan. Kasunod kaiyan an pagpahiling nin Kristianong pag-istimar. Kan daragita pa si Maude Abbott, nag-aatender sia nin pang-agang pahayag, dangan an gabos nagtitiripon sa halabang lamesa sa natad. “Kadakol kan masisiram na kakanon—hamon, pritong manok, dakol na klaseng tinapay, pie, saka keyk! An gabos nagkakakan sagkod sa kaya ninda, asin mga alas dos nin hapon nagtitiripon kami para sa saro pang pahayag.” Alagad inadmitir nia, “Kan mga oras na idto an gabos tinutungka na.” An haloy nang pilgrim na si Benjamin Barton sarong beses nagsabi, ‘Kun kinakan ko an gabos na masisiram na kakanon na itinatao sa sako, haloy na kutana akong nagadan.’ Sarong surat hale sa headquarters sa Brooklyn an nagsadol sa may marahay na intension na mga sister na mas marahay para sa gabos na kalabot na tawan an mga pilgrim nin “simple saka pang-aroaldaw sanang kakanon” asin “papahingaloon sinda nin toninong.”

Matibayon an mga pilgrim sa pagtotokdo asin paggamit nin mga tsart, representasyon (model), o ano man na yaon sana sa palibot tanganing magin buhay an tema ninda. An mga pahayag ni R. H. Barber “pirmeng may masiram na timpla sa espirituwal.” An garo ama na si W. J. Thorn nagtataram “siring sa patriarka kan suanoy na panahon.” Sarong aldaw mantang nakasakay sa Model A Ford, si Shield Toutjian biglang nagkurahaw, “Pondo nguna!” Luminukso sia hale sa auto, nagkua nin kadlaganon na mga burak, asin biglang tinokdoan an kairiba nia dapit sa mga linalang ni Jehova.

An gibohon nin pilgrim may dakol na kadepisilan, nangorogna sa mga medyo nagkakaedad na. Minsan siring, para sa nagkapira, an pinakadakulang pagbalo iyo an pagbabago sa pokus kan gibohon ninda. Inaasahan na sindang mangenot sa paghuhulit sa harong-harong. An Watch Tower na Marso 15, 1924, nagsabi na “an saro sa pangenot na mga gibohon” nin tunay na mga Kristiano “iyo an pagpatotoo dapit sa kahadean. Ipinadara an mga pilgrim huli sa katuyohan na ini.”

Minalataw na may mga pilgrim na habo kan pagbabagong iyan, huling binayaan ninda an gibohon na nagbibiahe, asin an nagkapirang nadiskontento nagbilog pa ngani nin sadiring relihion. Isinaysay ni Robie D. Adkins na an sarong pilgrim na matibay na ispiker maraot an boot na nagsabi: “An aram ko sana magpahayag sa plataporma. Dai ko talaga kayang magharongharong!” Nagirumdoman ni Brother Adkins: “Sunod kong nahiling sia sa kombension kan 1924 sa Columbus, Ohio. Sia an pinakamiserableng paghilingon duman, na nakatindog nin solo sa limpoy nin sadit na kahoy, na nagmomondo sa tahaw nin rinibong magayagayang tugang. Dai ko na sia nahiling giraray. Dai nahaloy, binayaan nia an organisasyon.” Sa ibong na lado, “dakol na maogmang tugang an nag-aaragi na may darang mga libro sa mga auto ninda,” na malinaw na gustong-gustong maghulit sa harong-harong.—Gui. 20:20, 21.

Minsan ngani an dakol na pilgrim tibaad ninenerbios arog kan mga sasanayon ninda, isinapuso ninda an saindang gibohon. Mapadapit sa paghuhulit sa harong-harong, an pilgrim na si Maxwell G. Friend (Freschel) na nagtataram nin Aleman nagsurat, “An kabtang na ini kan gibohon nin pilgrim nakakadugang sa mga bendisyon kan pagbiahe.” Ibinareta kan pilgrim na si John A. Bohnet na an mga tugang sa pangkagabsan bilog na pusong minaoyon sa pagdodoon sa paghuhulit kan Kahadean. Segun sa saiya, an dakulang mayoriya garo “naglalaad sa kaigotan na mapasaenotan nin ralaban.”

Sa nag-aging mga taon, an maimbod na nagbibiaheng mga tugang nagin marahay na impluwensia. “Daing duda na mahalaga asin kapakipakinabang an mga pilgrim, na naobserbaran ko ngani kan ako aki pa,” an sabi kan haloy nang Saksi na si Norman Larson. “Dakol an ginibo ninda sa pagmolde sako sa tamang paagi.” Sagkod ngonyan, an siring na mapagsakripisyo asin maimbod na nagbibiaheng mga paraataman nagtatabang sa mga kapagtubod na makapagsabi, “Kaya tang magharongharong!”

[Blurb sa pahina 32]

Maogmang aldaw idto kun yaon an pilgrim!

[Ritrato sa pahina 31]

An itineraryo ni Benjamin Barton kan 1905 igwa nin mga 170 pagdalaw

[Ritrato sa pahina 32]

Si Walter J. Thorn sarong pilgrim, na may kapadangatan na midbid sa apod na Pappy huli sa garo sa ama asin arog-Cristo na ugale

[Ritrato sa pahina 32]

Si J. A. Browne ipinadara sa Jamaica bilang pilgrim kan mga 1902 tanganing pakosogon asin parigonon an 14 sadit na grupo

[Ritrato sa pahina 32]

Huli sa gibohon nin mga pilgrim, an pagtubod napatalubo, an Kristianong pagkasararo napakosog, asin an mga tugang napadayupot sa organisasyon