Hali Siya sa Pamilya ni Caifas

Kun beses, direkta o bakong direktang kinukumpirmar kan arkeolohikong mga nadiskubre an pag-eksister nin sarong karakter sa Bibliya. Halimbawa, kan 2011, ipinublikar kan mga iskolar sa Israel an impormasyon manungod sa sarong nadiskubre na nagkukumpirmar nin siring. Saro idtong 2,000 anyos na lulubngan na ossuary—sarong may dekorasyon na kahon na gibo sa gapong puti na diyan ilinalaag an mga tulang kan gadan pagkalapa kan laman kaini.

An partikular na ossuary na ini may inskripsiyon na: “Si Miriam na aking babayi ni Yeshua na aking lalaki ni Caifas, saserdote ni Maazias hali sa Beth ʹImri.” An halangkaw na saserdoteng Judio na kalabot sa pagbista asin pagpagadan ki Jesus iyo si Caifas. (Juan 11:48-50) An historyador na si Flavio Josefo inaapod siyang “Jose, na inapod na Caifas.” Minalataw na sa saro sa mga paryente niya an ossuary na ini. Ipinapamugtak na sa halangkaw na saserdote mismo an ossuary na nainot nang nakua na may inskripsiyon na inapod siyang Yehosef bar Caiapha, o Jose, na aki ni Caifas.a Kaya sa paano man, si Miriam paryente ni Jose.

Uyon sa impormasyon kan Israel Antiquities Authority (IAA), an ossuary ni Miriam kinumpiskar hali sa mga naghabon sa sarong suanoy na lulubngan. Nakumpirmar an pagigin totoo kaiyan sa pag-analisar sa artifact asin sa inskripsiyon kaiyan.

May bago pa kitang maaaraman sa ossuary. Sinasambit diyan an ‘Maazias,’ an huri sa 24 dibisyon o grupo nin mga saserdote, na surusalidang naglilingkod sa templo sa Jerusalem. (1 Cron. 24:18) Ihinahayag sa inskripsiyon kan ossuary na “an pamilyang Caifas may koneksiyon sa grupo ni Maazias,” an sabi kan IAA.

Sinasambit man sa inskripsiyon an Beth ʹImri. May duwang posibleng interpretasyon sa kabtang na ini kan inskripsiyon. “An sarong posibilidad iyo na an Beth ʹImri ngaran nin sarong pamilya nin mga saserdote—an mga aki ni ‘Immer (Esdras 2:36, 37; Nehemias 7:39-42) na an mga gikan kabilang sa mga miyembro kan grupo ni Maazias,” an sabi kan IAA. “An ikaduwang posibilidad iyo [na an Beth ʹImri iyo] an pinaghalian na lugar kan nagadan o kan bilog niyang pamilya.” Arin man diyan, an ossuary ni Miriam nagtatao nin ebidensiya na an Bibliya nagsasambit nin totoong mga tawo na hali sa totoong mga pamilya.