Si Pedro Asin Ananias Nagputik—Anong Leksiyon an Manunudan Niyato?

Arog kan aram mo, an pagputik iyo an pagsabi nin bakong totoo. Nagibo mo na daw na magputik?—a Dawa an nagkapirang adulto na namumuot sa Diyos nakapagputik. Tibaad may bisto kang karakter sa Bibliya na nagputik. An pangaran niya Pedro, saro sa 12 apostol ni Jesus. Subaybayan ta an istorya kun taano ta nagputik si Pedro.

Kan inarestar si Jesus, dinara siya sa harong kan halangkaw na saserdote. Haros mag-aagahon na kaidto. Nakalaog si Pedro sa patyo kan harong kan saserdote na dai naririsa. Pero huli sa liwanag kan kalayo, namidbid si Pedro kan uripon na babayi kan halangkaw na saserdote na nagpalaog sa saiya. “Ika man kaiba ni Jesus,” an sabi niya. Sa takot ni Pedro, nagsabi siyang dai.

Sinasabi kan Bibliya na pagkatapos kaini saro pang babayi an nakarisa ki Pedro. Sabi kaini: “An lalaki man na ini kaiba ni Jesus.” Pignigaran giraray iyan ni Pedro. Dai nahaloy, may nagdurulok ki Pedro asin nagsabi: ‘Totoo man nanggad na ika saro sa sainda.’

Natakot si Pedro. Kaya sa ikatulong beses, nagputik siya, na an sabi: ‘Dai ko namimidbid an tawong iyan!’ Nagturaok an manok. Hiniling siya ni Jesus, asin nagirumduman ni Pedro an sinabi ni Jesus pirang oras pa sana an nakaagi: ‘Bago tumuraok an manok, papaindahan mo ako nin makatulo.’ Nagparahibi si Pedro. Grabe an pagbasol niya!

Puwede daw na mangyari iyan saimo?— Tibaad nasa eskuwelahan ka, tapos nadangog mong pinag-uulayan kan mga estudyante an Mga Saksi ni Jehova. “Dai sinda nagsasaludo sa bandera,” an sabi kan saro. “Dai sinda nakikipaglaban para sa nasyon ninda,” an sabi pa kan saro. May nagsabi pa, “Bako talaga sindang mga Kristiyano ta mayo sindang Pasko.” Tapos may nagrani saimo asin naghapot, “Bakong Saksi ni Jehova ka?” Anong sasabihon mo?—

Bago iyan mangyari, dapat na handa ka para makasimbag ka nin tama. Dai handa si Pedro. Kan siya nagipit, nagputik siya! Pero, grabe an pagbasol niya sa nagibo niya, kaya pinatawad siya nin Diyos.

Si Ananias, saro pa sa inot na mga disipulo ni Jesus, nagputik man. Pero siya asin an agom niyang si Safira dai pinatawad kan Diyos. Nag-uyon siya sa agom niya na magputik. Hilingon ta kun taano ta dai sinda pinatawad nin Diyos.

Sampulong aldaw pagkatapos bayaan ni Jesus an mga apostol asin magbalik sa langit, mga 3,000 an nabawtismuhan sa Jerusalem. Dakul an hali pa sa hararayong lugar tanganing iselebrar an Kapiyestahan nin Pentecostes, asin kan sinda magin mga disipulo ni Jesus, gusto nindang magdanay tanganing makanuod nin urog pa manungod sa bago nindang pagtubod. Kaya ginamit kan nagkapira sa mga disipulo ni Jesus an sadiri nindang kuwarta sa pag-asikaso sa sainda.

Ipinabakal ni Ananias asin Safira an pira sa pagsadiri ninda tanganing magkakuwarta, para makatabang sa bagong mga nabawtismuhan. Kan darahon ni Ananias sa mga apostol an kuwarta, sinabi niyang idto an bilog na kabaklan. Nagputik siya! Itinago niya an ibang kuwarta para sa sadiri niya! Sinabi ini nin Diyos ki Pedro, kaya sinabi ni Pedro ki Ananias: ‘Dai ka nagputik sa mga tawo, kundi sa Diyos.’ Pagkatapos, bigla na sanang nagadan si Ananias! Pakalihis nin mga tulong oras, naglaog si Safira. Dai niya aram an nangyari sa agom niya. Nagputik man siya asin nagadan.

Mapuwersang leksiyon ini: Mahalaga an pagsabi nin totoo! Iyo, kaipuhan ta gabos na manudan iyan! Pero, gabos kita makakagibo nin sala, lalo na kun aki pa kita. Dai ka daw nauugma na namumutan ka ni Jehova saka papatawadon ka man niya arog ni Pedro?— Pero tandaan, kaipuhan tang magsabi nin totoo. Kun makapagputik man kita, kaipuhan tang makimahirak sa Diyos na patawadon kita. Siguradong iyan an ginibo ni Pedro, kaya pinatawad siya. Kun pagmamaigutan tang dai na magputik, papatawadon man kita nin Diyos!