HAPOT HALI SA MGA PARABASA

Angay daw sa mga Kristiyano an cremation?

An Kasuratan mayo nin sinasabing ano man na pagkontra kun dapit sa cremation.

May mga pagkasaysay sa Bibliya dapit sa mga bangkay o tulang nin gadan na tawo na sinulo. (Jos. 7:25; 2 Cron. 34:4, 5) Tibaad ipinaparisa kaini na an mga tawong idto garo baga dai maninigo sa sarong disenteng lubong. Pero bako man pirming arog kaiyan an kahulugan kun pigki-cremate an bangkay.

Mahihiling ta ini sa pagkasaysay dapit sa pagkagadan ni Hading Saul asin kan tulong aking lalaki kaini. Sindang apat nagadan sa pakikipaglaban sa mga Filisteo. An saro sa mga aki iyo si Jonatan, na dayupot na katuod asin maimbod na parasuportar ni David. Kan maaraman kan pusuan na mga Israelita na nakaistar sa Jabes Galaad an nangyari, kinua ninda an apat na bangkay, sinulo iyan, asin ilinubong an mga tulang. Kan huri, inumaw ni David an mga Israelitang idto huli sa ginibo ninda.—1 Sam. 31:2, 8-13; 2 Sam. 2:4-6.

An suno sa Kasuratan na paglaom kan mga gadan iyo an pagkabuhay liwat—an pagbalik nin Diyos kan buhay nin sarong tawo. Baga man i-cremate o dai an bangkay, dai nalilimitaran si Jehova sa kakayahan niyang ibalik an buhay kan nagadan asin tawan ini nin bagong hawak. An tulong maimbod na Hebreo na napaatubang sa kagadanan kan ipagbuot ni Hading Nabucodonosor na iapon sinda sa nagkakalayong hurno dai natakot na kun sinda masulo, dai sinda kayang buhayon liwat nin Diyos. (Dan. 3:16-18) Totoo man iyan sa maimbod na mga lingkod ni Jehova na ginadan asin sinulo sa mga kampo de konsentrasyon kan mga Nazi. Dakul man na maimbod na lingkod nin Diyos an nagadan sa mga pagsabog o sa iba pang paagi na huli kaiyan dai na nakua an mga bangkay. Pero, siyertong bubuhayon sinda liwat.—Kap. 20:13.

Dai man kaipuhan na bilugon giraray ni Jehova an dating hawak kan sarong tawo tanganing buhayon siya liwat. Mahihiling iyan sa paagi kan pagbuhay liwat nin Diyos sa linahidan na mga Kristiyano pasiring sa buhay sa langit. Arog ni Jesus, na “binuhay sa espiritu,” an linahidan na mga Kristiyano binuhay liwat bilang an iyo man sanang persona pero may espirituwal na hawak. Dai nin parte kan dati nindang pisikal na hawak an makakaiba sa langit.—1 Ped. 3:18; 1 Cor. 15:42-53; 1 Juan 3:2.

An satong paglaom na pagkabuhay liwat nakadepende, bako sa kun ano an tibaad gibuhon sa bangkay, kundi sa pagtubod sa kakayahan nin Diyos asin sa pagmawot niyang utubon an saiyang mga panuga. (Gui. 24:15) Totoo, puwedeng dai ta lubos na masabutan kun paano ginibo nin Diyos an milagrong mga pagbuhay liwat kaidto o kun paano niya iyan gigibuhon sa maabot na panahon. Pero, nagtitiwala kita ki Jehova. Nagtao siya nin ‘patotoo,’ o garantiya, paagi sa pagbuhay liwat ki Jesus.—Gui. 17:31; Luc. 24:2, 3.

Marahay na konsideraron kan mga Kristiyano an napagkatudan kan komunidad, sentimyento kan mga tawo sa lugar na iyan, asin an legal na mga kahagadan mapadapit sa kun ano an gigibuhon sa bangkay. (2 Cor. 6:3, 4) Kaya, personal na desisyon o desisyon kan pamilya kun baga ipapa-cremate o dai an nagadan.