TEMA SA COVER | KAHADIAN NIN DIYOS—TAANO TA DAPAT MAGIN MAHALAGA IYAN SA SAIMO?

Kahadian nin Diyos—Taano ta Dapat Magin Mahalaga Iyan sa Saimo?

Posibleng naisip mo sa nainot na mga artikulo na mahalagang marhay sa Mga Saksi ni Jehova an Kahadian nin Diyos. Asin tibaad nagkainteres ka sa sinambit na mga bendisyon na itatao kan Kahadian nin Diyos. Pero, tibaad naiisip mo man na imposibleng mangyari iyan.

Tama sanang dai ka tulos maniwala sa gabos na nadadangog mo. (Talinhaga 14:15) Kapareho mo an mga taga-Berea kaidto.a Kan inot nindang madangog an maugmang bareta kan Kahadian, inako ninda iyan bakong dahil ta gusto sana ninda iyan na paniwalaan. Imbes, maingat nindang siniyasat an Kasuratan para mahiling ‘kun an mga bagay na ini iyo man nanggad.’ (Guibo 17:11) Buot sabihon, ikinumparar ninda an nadangog nindang maugmang bareta sa kun ano an sinasabi kan Kasuratan. Dai nahaloy, nakumbinsir sinda na an maugmang bareta talagang nakabasar sa Tataramon nin Diyos.

Maugma kang iniimbitaran kan Mga Saksi ni Jehova na gibuhon man iyan. Matatabangan ka kan samong programa nin libreng pag-adal sa Bibliya na ikumparar sa itinutukdo kan Bibliya an paniniwala kan Mga Saksi ni Jehova manungod sa Kahadian nin Diyos.

Apuwera sa manunudan mo manungod sa Kahadian nin Diyos, matatabangan ka kan pag-adal sa Bibliya na maaraman an simbag sa nagkapirang importanteng mga hapot sa buhay.

Sain kita hali?
Ano an katuyuhan nin buhay?
Taano ta tinutugutan nin Diyos an pagdusa?
Ano an nangyayari sa sato kun kita magadan?
Matutunaw daw an daga?
Ano an kaipuhan para magin maugma an pamilya?

Urog sa gabos, matatabangan ka kan pag-adal sa Bibliya na magin ‘harani sa Diyos.’ (Santiago 4:8) Dangan, mantang mas nagigin harani ka sa Diyos, mas nagigin malinaw man saimo kun ano an marahay na bagay na maitatao sa saimo kan Kahadian nin Diyos—bako sana sa ngunyan kundi sagkod lamang. Namibi si Jesus sa saiyang Ama: ‘Ini [nangangahulugan nin] buhay na dai nin katapusan, na sinda makamidbid sa saimo, na ika sana an tunay na Diyos, asin ki Jesu-Cristo na saimong sinugo.’—Juan 17:3.

Puwedeng gamiton kan Mga Saksi ni Jehova an publikasyon na ini para tukduan ka sa Bibliya.

Para mag-request nin libreng pag-adal sa Bibliya, makipag-ulay sa siisay man na Saksi ni Jehova o i-fill out an form sa www.jw.org/bcl. (Hilingon an MAG-REQUEST NIN PAG-ADAL SA BIBLIYA sa home page)

a An Berea sarong siyudad kan suanoy na Macedonia.

Kun Taano ta Mahalaga sa Saiya an Kahadian nin Diyos

Dai pa sana nahahaloy, sarong 10 anyos na aking babayi na an pangaran Folake an pinagibo nin essay sa eskuwelahan sa temang “An Pinakagusto Ko.” Isinurat niya an manungod sa kun taano ta gustong-gusto niyang sabihon sa iba an manungod sa Kahadian nin Diyos.

“An Kahadian nin Diyos sarong tunay na gobyerno,” an sabi ni Folake. “Pero dai mo iyan mahihiling—dawa magsulot ka pa nin salming!”

Isinurat man niya an manungod sa pinakahahalat niyang mga bendisyon, asin an nagkapirang problema na sosolusyunan kan Kahadian. Sabi niya, “Namumundo ako pag nakakahiling ako nin mga tawong dai nin harong na nag-iistar na sana sa tinampo” saka nin “mga aki sa iba-ibang parte nin kinaban na nagagadan dahil sa gutom.” Sabi pa niya, “Pero nauugma ako pag nababasa ko an Isaias 65:21.” Sinabi sa bersikulong iyan an panuga para sa mga tawong pamamahalaan kan Kahadian nin Diyos: ‘Mapatindog sinda nin mga harong asin mag-uuntok diyan; magibo sinda nin mga ubasan asin kakakanon an mga bunga kaiyan.’

Sinabi ni Folake na gustong-gusto niya man na mag-abot na an panahon na hahalion na kan Kahadian nin Diyos an gabos na hilang. Iiniba man niya sa essay an mga tataramon sa Kapahayagan 21:4 na nagsasabing ‘papahidon nin Diyos an gabos na luha sa saindang mga mata, asin an kagadanan mawawara na, dai na magkakaigwa nin pagmundo, ni pagtangis, ni kulog.’ Bilang pantapos, sinabi niya giraray na an pagsabi sa iba manungod ki Jehova saka sa saiyang Kahadian an pinakagusto niyang gibuhon. Malinaw na espesyal sa aking ini an Kahadian nin Diyos!