Mga Ideya kan mga Tawo Dapit sa Lugar nin mga Espiritu

Dakul an kontra sa mga ideyang iyan. Dai ta daa maiintindihan an dapit sa lugar nin mga espiritu huling mayo man daa nin nakaduman na makakapagsabi dapit diyan. Pero sala an argumentong iyan. Bago nagdigdi sa daga, nag-istar si Jesu-Cristo sa langit, sa lugar nin mga espiritu. Kaya daing pag-alangan niyang sinabi sa mga lider nin relihiyon kan inot na siglo: ‘Ako naghilig hali sa langit bako sa paggibo kan sadiri kong buot, kundi kan buot kaidtong nagsugo sako.’ Dahil hali mismo si Jesus duman, talagang masasabi niya sa saiyang mga apostol: ‘Sa harong kan sakong Ama, kadakul nin mga untukan.’—Juan 6:38; 14:2.

An Ama na sinasabi diyan ni Jesus mayong iba kundi an Diyos, na an ngaran Jehova, asin an “harong” ni Jehova nasa langit. (Salmo 83:18) Kaya, mayong mas urog na makakapagpaliwanag sa dai nahihiling na lugar na iyan kundi an Diyos na Jehova asin si Jesu-Cristo. Nagtao sinda nin kadakul na impormasyon dapit sa langit paagi sa pambihirang mga bisyon na ipinahiling ninda sa maimbod na mga tawo.

Sa sunod na artikulo, ipapaliwanag an nagkapirang pagkasaysay sa Bibliya dapit sa deskripsiyon kan mga lalaking nakahiling nin mga bisyon. Mantang pinag-iisipan an mga bisyon na ini, tandaan na an lugar nin mga espiritu bakong pisikal, na igwa nin mga bagay na nakakaputan o nahihiling. Kaya dai iyan ipinaliwanag nin Diyos sa paagi na espiritung mga linalang sana an makakasabot. Imbes, paagi sa mga bisyon, ilinadawan nin Diyos an espirituwal na mga bagay sa paaging masasabutan ta. Matatabangan kita kan mga bisyon na masabutan an dapit sa mga nasa lugar nin mga espiritu.