Sarong Masasarigan na Patotoo Hali sa Pinakasadit na Letrang Hebreo

Talaga daw na makakapagtiwala kita na mauutob an gabos na panuga nin Diyos? Si Jesus kumbinsido diyan asin an mga itinukdo niya nakapakusog sa pagtubod kan mga nagdadangog sa saiya. Pag-isipan an ilustrasyon na ginamit niya sa saiyang Sermon sa Bukid, na nasa Mateo 5:18: “Sinisigurado ko sa saindo, dawa pa mapara an langit asin daga, dai mapapara an sarong kasadit-saditing letra o kurit nin letra sa Katugunan sagkod na dai nauutob an gabos na bagay na ini.”

An pinakasadit na letra sa alpabetong Hebreo iyo an י (yod), asin iyan an inot na letra sa Tetragrammaton, an sagradong pangaran nin Diyos, an Jehova.a Apuwera sa aktuwal na mga tataramon asin letra sa Katugunan nin Diyos, an kada “kurit nin letra” na yaon diyan ibinibilang kan mga eskriba asin Fariseo na mahalagang marhay.

Buot sabihon ni Jesus, mas posible pang mapara an langit asin daga kisa dai mautob an pinakasadit na detalye kan Katugunan. Pero sinisiyerto sa sato kan Kasuratan na an literal na langit asin daga magdadanay sagkod lamang. (Salmo 78:69) Kaya malinaw na ipinapahiling kan mga tataramon na ini na dawa an pinakasadit na detalye kan Katugunan siguradong mauutob.

Mahalaga daw para sa Diyos na Jehova dawa an saradit na mga detalye? Iyo nanggad. Pag-isipan ini: Pinagbutan kaidto an mga Israelita na dai pagbarion an arin man na tulang kan korderong pampaskuwa. (Exodo 12:46) Garo sarong sadit na detalye sana iyan. Aram daw ninda kun taano ta dai dapat barion an arin man na tulang kaiyan? Posibleng dai. Pero aram kan Diyos na Jehova na an detalyeng iyan sarong hula dapit sa mangyayari sa Mesiyas, na mayo ni saro sa mga tulang kaini an mababari pag ipinagadan na ini sa hariging pasakitan.—Salmo 34:20; Juan 19:31-33, 36.

Ano an itinutukdo sa sato kan mga tataramon na iyan ni Jesus? Makakapagtiwala nanggad kita na mauutob an gabos na panuga kan Diyos na Jehova, sagkod sa pinakasadit-saditing detalye. Sarong masasarigan nanggad na patotoo hali sa pinakasadit na letrang Hebreo!