Hapot
● Kun an bilog na apat na pagtiripon ginigibo sa sarong aga o hapon, angay daw na magkaigwa nin intermisyon, na sa panahon na iyan may ipinupuwestong meryenda?
An kadaklan na kongregasyon na ginigibo an apat na pagtiripon sa sarong aldaw nakanompong na kun ginigibo iyan na daing pahingalo, matatapos ini sa laog nin 31⁄2 oras. Kun minsan sa mga pandistritong kombension nagtutukaw kita sa laog nin haros arog kaini kalawig na mayong intermisyon, kaya bako man tunay na masakit sa mga tugang kun mayong iareglong intermisyon.
Minsan siring, kun mawot nin nagkapirang kongregasyon na magkaigwa nin 10 o 15 minutos na intermisyon pakatapos kan enot na duwang pagtiripon tanganing an mga tugang puwedeng magduman sa kasilyas o uminom nin tubig, mayo nin problema sa bagay na ini. Alagad minsan an kongregasyon o an mga indibiduwal dai maninigong mag-organisar nin ano man na meryenda durante kan panahon na ini. An pangenot na rason na nag-aatender kita sa mga pagtiripon huli sa espirituwal na pagkakan. Kun an mga tugang nag-aandam nin meryenda kadakol na panahon an nagagamit sa pag-areglo kaini, asin nakaoolang ini sa sainda sa orog na mahalagang espirituwal na katuyohan kan mga pagtiripon.
An nagkapirang kongregasyon nag-organisar kan siring na meryenda bilang paagi nin pagtipon nin kuwarta para sa mga panggastos sa Kingdom Hall, alagad bako ini an tamang paagi sa paggibo kaini. An mga kontribusyon maninigong itao kaoyon kan boluntad na espiritu nin pagtatao sa 2 Corinto 9:7. Nagtutubod kami na makikinabang an gabos sa espirituwal na paagi sa pagsunod sa mga susunudon na ini, sa siring ginigibo “an gabos na bagay sa disente asin aregladong paagi.”—1 Cor. 14:40.