Pakikitipon kan Kamagurangan sa mga Payunir
1 Sa bulan na ini an saro o duwang magurang makikitipon sa gabos na regular asin espesyal payunir tanganing pag-olayan an saindang gibohon bilang panbilog na panahon na mga lingkod. An pagtiripon malawig nin haros sarong oras asin oyon sa isinuherir na outline na itinao kan Sosyedad.
2 Sa pagtiripon na ini marahay na konsideraron kan kamagurangan an gibohon sa langtad kan mga regular payunir. Narisa na kadakol an dai nakaabot sa kahagadan sainda na 1,000 oras kan nakaaging taon asin kan sinuratan an kamagurangan dapit kaini, irenekomendar ninda an dakol na payunir na magdanay sa listahan asin na maghihingoa sindang maabot an kahagadan sa oras sa taon na ini nin paglilingkod. Ngonyan na apat na bulan na an nakaagi sa 1990 taon nin paglilingkod, an gabos na regular payunir dapat na nakaabot na kan haros ikatolong kabtang kan saindang taonan na oras o haros 334 oras. Kun an siisay man kulang pa, maninigong tabangan sinda sa pagtiripon tanganing maabot an nawarang panahon sa natatadang walong bulan kan taon nin paglilingkod.
3 Masisierto niato na an pagtiripon na ini makatatabang sa gabos na payunir na apresyaron an saindang pribilehiyo asin paninimbagan nin orog pa, sa siring nagtatao nin marahay na halimbawa sa gabos sa kongregasyon.