Paggamit kan Brochure na “Uya!” sa mga Pagdalaw Liwat
1 Aram ni apostol Pablo an kahalagahan kan pangangataman sa mga nagpaheling nin interes sa katotoohan. Ikinomparar nia sinda sa lumbod na mga tanom na nangangaipo nin regular na pagbaribi asin pagkultibar. (1 Cor. 3:6-9) Siring man ngonyan, an mga interesado nangangaipo nin maingat na pag-asikaso na itinatao niato kun ginigibo ta an mga pagdalaw liwat tanganing makultibar an saindang espirituwal na pagtalubo.
2 Sa kada pagdalaw liwat marahay na repasohon sa halipot kun ano an pinag-olayan nindo kan enot na pagsongko, na isinisentro an atension sa mga punto na pinahelingan nin interes kan kagharong. Ilabot an kagharong sa pag-orolay asin saboton an saiyang mga pinagkakainteresan asin pangangaipo.
3 Sa paggibo nin pagdalaw liwat, baga man ikinapasakamot o dai an brochure na “Uya!”, tibaad boot nindong gamiton an pagdolok na ini sa pagpopoon nin pag-adal:
◼ “Kadakol na tawo an nakaolay niamo na nanompongan an mga simbag sa saindang mga hapot sa Biblia paagi sa paggamit kan brochure na ini.” Dangan sa pagpaheling kan 12 hapot sa pahina 30 kan brochure na “Uya!”, puwede kamong maghapot: “Arin na hapot an mawot nindong masimbag?” Buksan an pahina na nagsisimbag sa hapot asin ipaheling sa kagharong an mga hapot sa kada parapo. Pag-olayan an nagkapirang punto asin gumibo nin seguradong areglo na madalaw liwat.
4 An saro pang pagdolok puwedeng:
◼ “Talagang ogmahon ako sa satong pag-orolay kan nakaaging semana. Kadakol kan naghahapot kun taano ta padagos kaming nagsosongko sa mga harong. Naisip ko na magigin kamong interesado sa komento na yaon sa pahina 26 kan brochure na ini. [Ipaheling an ilustrasyon kan pag-adal sa Biblia asin basahon an mga kabtang kan parapo 51 asin 52.] Basado sa nabasa niato digdi, ano an masasabi nindong kahagadan tanganing makalaog sa Paraiso?” Pasimbagon asin gumibo nin areglo na mabuwelta tanganing ipadagos an pag-adal.
5 Pinasusundan an enot na pagdalaw na ikinapasakamot an brochure na “Uya!”, puwede nindong sabihon:
◼ “Kan huri kong pagsongko, pinag-olayan niato an mga kamugtakan kan kinaban na nangangaipo nin pagbabago. Napaghorophorop na daw nindo kun taano ta tinotogotan nin Dios an karatan?” Pasimbagon asin buksan an pahina 15, parapo 27-9, na rinireparo an mga hapot sa pag-adal. Basahon asin pag-olayan an mga parapo.
6 Kun Ikinawalat an Sarong Tract: May beses na ikinakawalat an tract sa enot na pagsongko. Sa mga pagdalaw liwat, puwede nindong ipakipag-olay an saro o duwang parapo sa tract kaiba an sitadong mga kasuratan. Dangan ipaheling kun paano an saro sa mga kasuratan sa tract mas detalyadong pinag-oolayan sa brochure na “Uya!” Kun nagpapaheling nin interes an indibiduwal, bobooton nindong ialok an brochure asin gumibo nin areglo tanganing ipadagos an pag-orolay sa sunod nindong pagdalaw.
7 Mantang maimbod niatong inaasikaso an pagbabaribi sa lumbod na mga tanom kan Kristianong pagtubod na satong inaataman, iyan patataluboon nin Dios sa saiyang ikaoomaw asin ikamumuraway.—1 Cor. 3:7.