Pagdalaw Liwat na May Pasohan na Makapoon nin Pag-adal sa Biblia
1 Pakatapos na manompongan an interesadong tawo, kaipuhan na pagdanayon ta na buhay an interes. An paggibo nin mga pagdalaw liwat puwedeng gumiya sa pag-adal sa Biblia. Konsideraron an mga suhestion na ini sa paggibo nin epektibong mga pagdalaw liwat.
Sa pagtatapos kan enot na pagdalaw, puwede nindong ibugtak an pundasyon para sa pagdalaw liwat paagi sa paghapot nin:
◼ “Nakapaghorophorop na daw kamo kun taano ta kadakol na relihiyon?” Sa pagdalaw liwat puwede nindong sabihon: “Kan huri kong pagdigdi, napag-olayan niato kun taano ta kadakol na relihiyon. Boot kong basahon an nakaiinteres na bagay na naheling ko sa hapot na ini.” Buksan an pahina 322 kan librong Reasoning asin basahon an kabtang sa irarom kan subtemang “Why are there so many religions?”
2 Manonompongan daw an Dios sa gabos na relihiyon? Tanganing an Dios magin yaon sa relihiyon, maninigo na iyan magpaluwas kan tamang mga bunga.
Sa pagpopoon nin pagdalaw liwat, puwede nindong ihapot:
◼ “Paano an relihiyon maninigong makaapektar sa ugale nin saro? An sinabi ni Jesus sa Mateo 7:17-20 nagtatao sato kan reglamento na kaipuhan na sunodon nin tunay na relihiyon.” Basahon nin direkta an kasuratan sa poro kan parapo 19 sa pahina 12 kan librong Mankind’s Search for God. Dangan hapoton an kagharong kun ano an naheheling nia sa retrato sa pahina 13. Dangan, basahon an enot na duwang sentence sa parapo 20. “An madahas na mga gibong ini nagpapamidbid sa mga relihiyon na dai nagsusunod sa instruksion ni Cristo na mamoot sa lambang saro, pati sa satong mga kaiwal. Sa masunod kong pagdalaw, tibaad puwede niatong pag-olayan an marahay na mga bunga na kaipuhan na paluwason kan tunay na relihiyon.”
3 Ano an itinatagama kan ngapit para sa mga naghahanap sa tunay na Dios? An pag-orolay sa hapot na ini dian mismo sa librong Search for God puwedeng gumiya sa pag-adal sa Biblia.
Sa pagpopoon nin pag-orolay, puwede nindong sabihon:
◼ “Huli sa mga problema sa ekonomiya, kadakol kan naghahapot kun magkakaigwa sinda nin positibong pagmansay sa ngapit. Pero an Biblia nakapakokosog nin marhay manongod digdi. Togotan nindo akong ipaheling saindo an panuga nin Dios sa Isaias 65:21, 22, 25. [Basahon asin komentohan nin halipot.] Sinisimbag kan librong Mankind’s Search for God an ibang interesanteng hapot manongod digdi, poon sa parapo 17 sa pahina 372.” Dangan idemonstrar an pag-adal sa Biblia, na ginagamit an parapo 17-20. “Sa masunod na semana boot ko na ipakipag-olay an hapot na, Ano an pundasyon para sa bagong kinaban na ipinanunuga sa Biblia?”
4 Madonong na gamiton an natatadang panahon na makatao nin lubos na pagpatotoo. (Ikomparar an Gibo 20:21.) An paggibo nin mga pagdalaw liwat na may pasohan na makapoon nin pag-adal sa Biblia puwedeng mangahulogan nin buhay na daing katapusan sa mga hinuhulitan niato.