Hapot

◼ Sa teokratikong kasal, pira an kinakaipuhan na testigo tanganing pumirma sa kontrata sa kasal kaiba kan mag-agom na kinakasal?

Sa mga surat na naresibi mi, garo baga an hapot na ini nagdodolot nin paghadit sa nagkapirang tugang. An iba nagkaigwa nin dakol na testigo sa saindang kasal, na nagpahiro sa iba na sumurat sa Sosyedad. Tanganing magkaigwa nin sararong pagmansay sa bagay na ini, naoogma kaming itao an minasunod na mga punto.​—1 Cor. 1:10.

An The Watchtower kan Hunyo 15, 1952 sa pahina 360 nagsabi: “Hinahagad sa nobya asin nobyo na magin presente asin patunayan sa atubangan nin mga testigo na inaako ninda an mga obligasyon sa pag-agoman; asin haros kahagadan kan gabos na banwaan asin probinsia an duwang testigo apuwera sa parakasal na pumirma sa sertipiko nin pag-agoman.” Idinodoon man kan artikulo an puntong ini paagi sa pagkaigwa nin sadit na ilustrasyon na ipinaheheling sana an mag-agom na kinakasal, duwang testigo, asin an parakasal. Digdi sa Pilipinas, duwa sanang legal na testigo an kahagadan, arog sa ipinaheheling kan bagay na an itinaong espasyo sa Kontrata sa Kasal para sa duwa sanang testigo.

Mantang an solamenteng katuyohan kan mga testigo panigoan an legal na mga kahagadan para sa pag-agom, kun siring an ano man na lihis digdi sobra asin dai kinakaipuhan. Kaya, taano ta bobooton nin siisay man na tugang na lalaki asin babae na magkaigwa nin labi pa sa duwa na mapirma sa saindang dokumento sa kasal? Kita daw tibaad nagsusunod sa kinabanon na kaugalean? Yaon daw an peligro na kita nagpapaabaw-abaw sa iba?​—1 Juan 2:​15-17.

Sa pagmate niamo an nasa enotan na prosedimiento sa pagkaigwa nin duwa sanang testigo, sarong lalaki asin sarong babae, na mapirma sa Kontrata sa Kasal maninigong sunodon kan gabos na kalabot sa teokratikong mga kasal sa ngapit na pangengenotan kan iinasignar kan Sosyedad na parakasal. Linalaoman na an impormasyon na ini matabang sa gabos na magkaigwa nin mas rasonableng pag-atubang sa bagay na ini kisa sa nagin totoo sa ibang kaso kan nakaagi.