Mga Hobenes—Paogmaha Nindo an Puso ni Jehova

¹ Kun ginagamit nin saro an kakosogan asin kabagsikan nin pagkahoben sa tamang paagi, an buhay magigin tunay na maogma. An madonong na si Hadeng Salomon nagsurat: “Mag-ogma ka, soltero, sa saimong pagkahoben, asin an saimong puso pagiboha nin karahayan sa saimo sa mga aldaw kan saimong pagkabarobata.” (Ecl. 11:9) Kamong mga hobenes maninimbag sa Dios para sa saindong mga gawe.

² An paagi kan saindong pamumuhay may dakulang epekto bako sana sa saindo kundi pati sa saindong mga magurang. An Talinhaga 10:1 nagsasabi: “An aking madonong iyo an saro na nagpapaogma sa ama, asin an aking kablas ikinamomondo nin saiyang ina.” Alagad orog pang mahalaga, an paagi kan saindong pamumuhay nakaaapektar sa saindong Kaglalang, si Jehova Dios. Iyan an dahelan na dinadagka man kan Talinhaga 27:11 an mga hobenes: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.” Paano nindo mga hobenes mapaoogma an puso ni Jehova ngonyan? Puwede ining magibo sa nagkapirang paagi.

³ Paagi sa Tamang Halimbawa: Kamong mga hobenes nakaeeksperyensia kan “delikadong mga panahon na masakit pakibagayan” na ihinula sa Tataramon nin Dios. (2 Tim. 3:1) Tibaad mapairarom man kamo sa pangigipit nin daing pagtubod na mga kaeskuwela asin pati nin mga maestro na tibaad tutuyaon an saindong mga punto-de-vista na basado sa Biblia. Halimbawa, an sarong maestro iinatubang na totoo an teoriya nin ebolusyon asin na eroestorya sana an Biblia. Alagad, an sarong hoben na parahayag sa klaseng idto maimbod na idinepensa an Biblia. Bilang resulta, nagkapirang pag-adal sa Biblia an naponan. An ibang interesado nagpoon na umatender sa mga pagtiripon. An pagtubod nindo mga hoben na tugang na lalaki asin babae kinokondenar an maraot na kinaban asin dinadagka an mga sadiosan an puso pasiring sa katotoohan.​—Ikomparar an Hebreo 11:7.

⁴ Madadagka daw nindo an saindong mga kaedad sa kongregasyon tangani na dai sinda padara sa maraot? Paagi sa pagtao nin marahay na halimbawa sa eskuwelahan, sa harong, asin sa kongregasyon, maparirigon nindo an pagtubod nin ibang hoben na parahayag. (Roma 1:12) Paogmaha nindo an puso ni Jehova paagi sa pagtao nin halimbawa sa iba.

⁵ Paagi sa Gubing Asin Pag-alinyar: An sarong hoben na tugang na babae sinubahan asin pinagtuya huli sa saiyang mabining gubing asin binansagan na “dai madotdot.” Dai ini nakapatakot saiya na umoyon sa maraot na mga pamantayan nin kinaban. Imbes, ipinaliwanag nia na sia saro sa mga Saksi ni Jehova asin an halangkaw na pamantayan kan mga Saksi an saiyang sinusunod. Igwa daw kamo nin siring na sarig nin boot? O tinotogotan daw nindo an kinaban ni Satanas na moldehon kamo sa pag-isip asin paggawe kaiyan? Kanigoan kaogma na mamasdan an dakol sa saindo mga hobenes na naghihimate sa pagtotokdo ni Jehova asin isinisikwal an usmak na mga estilo, uso, iniidolo, asin pagtotokdo kan kinaban. Tunay nanggad, arog kan satong nanodan sa nakaagi pa sana niatong pandistritong kombension, dapat niatong midbidon na an mga bagay na gikan sa kinaban impluwensiado nin mga demonyo!​—1 Tim. 4:1.

⁶ Paagi sa Pagpili nin mga Aling-alingan Asin Dibersion: Kaipuhan na girumdomon nin mga magurang an pangangaipong tabangan an saindang mga aki sa madonong na pagpili nin tamang klase nin pag-aling-aling asin dibersion. An sarong tugang na lalaki inomaw an sarong marahay na pamilya na nanodan niang kamotan na marhay. Huling mapag-isip sa espirituwal, an mga magurang nagtao nin paggiya na iinaplikar man sa pampamilyang pag-aling-aling. An tugang nagkomento: ‘Hinangaan ko an paggibo ninda na magkairiba. Bako sanang tinatabangan kan mga magurang an mga aki sa pag-andam para sa paglilingkod, kundi sa panahon nin pag-aling-aling, may pag-orogma sinda sa pagbaklay, pagpasyar sa mga museo, o pagdanay sana sa harong asin pagkarawat o paggibo nin mga proyekto. An saindang pagkamoot sa lambang saro asin sa iba makapamamate saindo nin kapanarigan na sinda malakaw sa katotoohan sa ngapit, ano man an mangyari.’

⁷ Siyempre, may mga panahon na bakong posible para sa bilog na pamilya na makapagdibersion asin makapag-aling-aling. Kamong mga hobenes dapat na nakasasabot kaini asin kan pagigin seryoso nin pagpili kun paano nindo gagamiton an saindong ibang libreng panahon. Determinado si Satanas na dayaon an pinakadakol na mapupuwede. An mga hoben asin dai pang kabatidan nangorognang madaling mabiktima kan saiyang tusong mga pakana asin mapandayang mga pan-agyat. (2 Cor. 11:3; Efe. 6:11) Kaya ginagamit ngonyan ni Satanas an laen-laen na paagi na sugotan kamo na malingling asin pag-aaboton an buhay nin paslong pagpanigo sa kasingawan asin karatan.

⁸ An telebisyon sarong ekspertong parasugot na pinalalakop an materyalistiko asin inmoral na estilo nin buhay. An mga pelikula asin video regular na itinatampok an kadahasan asin hayag na marhay na sekso. An popular na musika nagin orog na maraot asin malaswa. An mga pan-akit ni Satanas tibaad garo baga bakong maraot, alagad nasiod kaiyan an rinibong hoben na Kristiano sa salang kaisipan asin gawe. Tanganing matumang an siring na mga impluwensia, kaipuhan kamong maigot na sumunod sa katanosan. (2 Tim. 2:22) Kun kinakaipuhan an pagliliwat sa saindong kaisipan o gawe may koneksion sa pag-aling-aling asin dibersion, paano ini magigibo? Itinatao kan salmista an simbag: “Sa bilog kong puso hinanap taka. Dai mo ako pabayaan na malagalag parayo sa saimong mga pagboot.”​—Sal. 119:10.

⁹ Uso an pag-idolo sa mga sikat sa karawat asin aling-alingan. An pagkatakot ki Jehova matabang saindo na lumikay sa pag-idolo sa bakong sangkap na mga tawo. Pati an seksuwal na inmoralidad iniidolo nin dakol ngonyan. Makapag-iingat kamo sa tendensiang ini paagi sa paglikay sa pornograpiya asin nakararaot na musika. Manongod sa musika, an Abril 15, 1993 na luwas kan An Torrengbantayan nagkomento: “An musika banal na balaog. Pero para sa dakol iyan nagigin nakararaot na apisyon. . . . Gibohon na pasohan nindo na papagdanayon na nasa lugar an musika asin gibohon na mayor na pinagmamakolgan an aktibidad ni Jehova. Magin mapamili asin maingat sa musikang pinipili nindo. Sa siring magagamit nindo​—bakong abusohon—​an banal na balaog na ini.”

¹⁰ Kultibaron an lubos na pagkaongis sa maraot. (Sal. 97:10) Kun nasusugotan na gumibo nin maraot, isipon kun paano minamansay ni Jehova an bagay, asin horophoropon an mga resulta: dai ginustong mga pagbados, mga helang na ikinaolakit paagi sa seksuwal na pagdodorog, pagkalaglag nin emosyon, pagkawara nin paggalang sa sadiri, asin pagkawara kan mga pribilehiyo sa kongregasyon. Likayan na ilantad an saindong sadiri sa mga pasale sa TV, pelikula, video, kanta, o mga pag-orolay na dinadagka an karatan. Likayan an pakiibaiba sa mga ibinibilang kan Biblia na “mga mangmang.” (Tal. 13:19) Magin mapamili; pilion bilang dayupot na kaibaiba an mga nasa kongregasyon na namomotan si Jehova asin an saiyang matanos na mga pamantayan.

¹¹ Iyo, an mga hobenes na talagang boot na paogmahon an puso ni Jehova hihimateon an marahay na hatol sa Efeso 5:​15, 16: “Magmaan kamong marhay na an saindong paglakaw bakong siring sa mangmang kundi siring sa mga madonong, na tinutubos an panahon para sa saindo man sana, huli ta an mga aldaw maraot.” Ano an matabang saindo na ‘makamaan na marhay’ sa saindong pag-oswag sa huring mga aldaw na ini?

¹² Pag-asikaso sa Espirituwal na mga Pangangaipo: Sa Mateo 5:​3, si Jesus nagkomento: “Maogma idtong mga nakamamate kan saindang espirituwal na pangangaipo.” Kamo man puwedeng magin maogma paagi sa pakamate kan saindong espirituwal na pangangaipo. Kabale sa pagpanigo sa pangangaipong iyan an maigot na pakikikabtang sa paghuhulit kan maogmang bareta, huling pinaririgon kaini an pagtubod niato sa satong mga nanonodan.​—Roma 10:17.

¹³ Aram nindo gikan sa personal na eksperyensia na bako perming pasil na makapakikabtang nin regular sa ministeryo. An kadaklan kaini tibaad huli sa kakulangan nin kompiansa. Kaya, kaipuhan na marigon an determinasyon nindo. Paagi sa regular na pakikikabtang sa ministeryo, mapaooswag nindo an saindong kakayahan sa pagpapatotoo asin maparirigon an kompiansa sa saindong abilidad sa paghuhulit.

¹⁴ Gumibo nin mga areglo na maghulit kaiba nin mas eksperyensiadong mga parahayag sa kongregasyon, arog baga kan mga regular payunir asin mga magurang. Atentong hinanyogon an saindang mga pag-atubang asin kun paano ninda sinisimbag an mga pagtumang kan kagharong. Gamiton nin marhay an librong Reasoning asin an mga suhestion na iinatubang sa An Satong Ministeryo sa Kahadean. Dai mahaloy kakamtan nindo an orog na kagayagayahan sa ministeryo huli ta itinatao nindo an gabos nindong makakaya ki Jehova.​—Gibo 20:35.

¹⁵ May mga nakaaprobetsar sa mga oportunidad na makapatotoo sa eskuwelahan asin nagin mapanggana nanggad sa paggibo nin mga disipulo. (Mat. 28:​19, 20) An sarong Kristianong hoben nagsabi: “Durante nin mga bakanteng oras sa klase, dakol akong oportunidad na magpatotoo, nangorogna durante nin kinabanon na mga kapiyestahan. Kan iwalat ko sa tukawan an mga publikasyon sa Biblia kun saen puwedeng maheling iyan nin iba, dakol na interesadong estudyante an duminolok sako.” Sa huri, an nagkapirang estudyante asin pati an maestro nagpoon na umatender sa Kristianong mga pagtiripon. An totoo, an maestro nag-oswag sagkod na magin dusay na Saksi. Si Jehova naoogmang marhay kun an hoben na mga parasamba arog nindo nagtatao nin kaomawan sa saiyang ngaran.

¹⁶ An saro pang paagi na mapanigoan an saindong espirituwal na pangangaipo iyo an personal na pag-adal. Tanganing mapaogma an puso ni Jehova, dapat kitang magkua nin kaaraman dapit sa saiya, sa saiyang mga katuyohan, asin sa saiyang mga kahagadan sa sato. Nagtatagama daw kamo nin oras para sa personal na pag-adal? Kamo daw regular na nag-aadal, kun paano na kamo igwang oras sa regular na pagkakan? (Juan 17:3) Igwa daw kamo nin personal na iskedyul sa pagbasa sa Biblia apuwera pa sa paghihingoang makasunod sa iskedyul nin pagbasa sa Biblia sa Teokratikong Paadalan sa Pagmiministro? Nag-aandam daw kamong marhay para sa gabos na pagtiripon? Regular daw nindong binabasa an mga magasin na Torrengbantayan asin Awake!? Partikularmente, nagtatagama daw kamo nin panahon sa pagbasa kan kada artikulo sa seryeng “Young People Ask . . . ,” na maingat na sinisiyasat an kada teksto? Asin dai paglingawan an libro na dinisenyo kan Sosyedad espesyalmente para sa saindong espirituwal na mga pangangaipo, an Questions Young People Ask​—Answers That Work. An Kristianong mga hobenes asin an saindang mga magurang sa bilog na kinaban nagsurat tanganing sabihon kun paano an librong ini nakatabang sainda na orog na rumani ki Jehova.

¹⁷ Kun binabasa nindo an Biblia asin teokratikong mga pantabang sa pag-adal sa Biblia, isinasaysay kaiyan saindo si Jehova, an saiyang kaisipan, asin an saiyang mga katuyohan. Horophoropon kun paano makatatabang saindo an impormasyon na ini. Ikonektar an saindong binabasa sa dati na nindong nabasa. Kalabot digdi an paghorophorop. An paghorophorop pinangyayari na makaabot sa puso an impormasyon asin motibaron kamo.​—Sal. 77:12.

¹⁸ Naggagayagaya kitang maheling na nag-aatender sa mga pagtiripon sa kongregasyon an mga hobenes na nakamamate sa saindang espirituwal na pangangaipo. Kamong Kristianong mga hobenes makadadagka sa iba paagi sa regular na pagtao nin makahulogan na mga komento sa mga pagtiripon. Gibohon na pasohan na makatao nin kisuerra sarong komento sa kada pagtiripon. Pataluboon an malaad na relasyon sa mga tawo sa gabos na edad sa kongregasyon paagi sa pakikikabtang sa nakapakokosog na pakiaasosyar bago asin pakatapos kan mga pagtiripon. (Heb. 10:​24, 25) An sarong hoben na tugang na lalaki nagsabi na an saiyang mga magurang dinagka siang makipag-olay sa kisuerra sarong may edad nang tugang na lalaki o babae sa kada pagtiripon. Ngonyan pinahahalagahan nia an eksperyensia na nakamit nia sa pakiaasosyar sa mga may edad nang miembro kan kongregasyon.

¹⁹ Pag-aaboton an Espirituwal na mga Pasohan: Makamomondo na an buhay nin dakol na hobenes mayo nin katuyohan asin direksion. Minsan siring, bako daw marahay na maeksperyensiahan an pagmate na bunga nin pagbugtak nin teokratikong mga pasohan dangan mapangganang naaabot iyan? An mga pasohan na ini, na pinag-aaabot sa liwanag kan pagtotokdo nin Dios, magigin personal na nakakokontento ngonyan asin sa kahurihurihi magiya pasiring sa sagkod lamang na kaligtasan.​—Ecl. 12:​1, 13.

²⁰ Kun nagbubugtak nin mga pasohan, ipagngayongayo iyan. Kaolayon an saindong mga magurang asin an mga magurang sa kongregasyon. Siyasaton an saindong sadiri asin an saindong mga kakayahan, asin magbugtak nin praktikal na mga pasohan sono sa kaya nindong gibohon asin bakong sa pagkomparar sa kiisay pa man. An lambang saro laen an pagkahaman​—sa pisikal, mental, emosyonal, asin espirituwal. Kun siring, dai laomon na magibo an gabos na nagigibo nin iba.

²¹ Ano an nagkapirang pasohan na puwede nindong pag-aaboton? Kun bako pa kamong parahayag o dai pa nababautismohan, taano ta dai gibohon ini na saindong mga pasohan. Kun kamo parahayag, puwede nindong gibohon na pasohan an pagtao nin sarong depinidong bilang nin oras sa ministeryo kada semana. Magmaigot na magin may kakayahan na paratokdo sa mga pagdalaw liwat, asin gibohon na saindong pasohan an pagkondukta nin pag-adal sa Biblia. Kun kamo bautisadong hoben sa eskuwelahan, taano ta dai gibohon na saindong pasohan na mag-auxiliary payunir durante kan mga bulan na tig-init? “Dakol an gigibohon sa gibohon kan Kagurangnan.”​—1 Cor. 15:58.

²² Mahalaga an Tabang nin mga Magurang: An mga hobenes sa kongregasyon dai maninigong maghona na nagsosolo sinda sa saindang mga pagmamaigot na magkamit nin buhay. Si Jehova, paagi sa saiyang organisasyon, nagtao nin hatol tanganing tabangan an mga hobenes na ini sa paggibo nin mga desisyon sa aroaldaw asin sa pakapanggana sa mga kaolangan sa buhay. Siyempre, an nagdusay na mga magurang igwang pangenot na paninimbagan na tabangan an saindang mga aki sa paggibo nin tamang mga desisyon. Sa 1 Corinto 11:​3, ninonombrahan kan Biblia an agom na lalaki bilang payo kan pamilya. Kaya, sa laog nin Kristianong pamilya, kaiba kan agom na babae na maigot na nagtatabang saiya, an ama pinangengenotan an pagtotokdo kan mga pagboot nin Dios sa mga aki. (Efe. 6:4) Nagigibo ini paagi sa maingat na pagsasanay na nagpopoon sa pagkaomboy. Mantang an hotok nin sarong aki triple an pagdakula sa enot na taon nin buhay, an mga magurang dai maninigong pagmenuson an kakayahan kan saindang omboy sa pakanood. (2 Tim. 3:15) Mantang nagtatalubo an mga aki, an mga magurang kaipuhan na progresibong tokdoan sinda na kamotan si Jehova asin pataluboon an marahay na relasyon sa saiya.

²³ Sa “Banal na Pagtotokdo” na Pandistritong Kombension, igwang pahayag na may temang “Magmaigot Para sa Kaligtasan kan Saindong Harong.” Ihiniras an manlaenlaen na punto sa pagtabang sa mga magurang na masabotan an praktikal na mga paagi na matabangan ninda an saindang mga aki. An marahay na halimbawa nin mga magurang an pinakamarahay na lugar na dapat ponan. Mas dakula an magigibo kaini sa pagtabang sa saindong mga aki sa espirituwal na paagi kisa pagparataram sa sainda dapit kan maninigo o dai maninigong gibohon ninda. An pagtao kan tamang halimbawa nin mga magurang kabale an pagpaheling kan mga bunga nin espiritu sa laog nin harong, sa saindong agom asin sa saindong mga aki. (Gal. 5:​22, 23) Naheling nin dakol gikan sa eksperyensia na an espiritu nin Dios mapuwersang impluwensia para sa ikararahay. Iyan makatatabang saindo na moldehon an kaisipan asin puso kan saindong mga aki.

²⁴ Nasambitan man sa kombension an pangangaipo nin mga magurang na tumao nin marahay na halimbawa sa ugale sa personal na pag-adal, pag-atender sa mga pagtiripon, asin regular na pagpartisipar sa ministeryo sa langtad. Kun kamo entusiastikong ipinakikipag-olay an katotoohan sa harong, maigot na nangengenot sa ministeryo, asin positibo dapit sa personal na pag-adal, an saindong mga aki madadagka na magkaigwa nin sinserong interes sa espirituwal na mga bagay.

²⁵ Kun makonsiderasyon na inandam, an regular, makahulogan na pampamilyang pag-adal sa Biblia magigin interesante asin nakaoogma, panahon nin nakapakokosog sa boot na pag-iribaiba kan pamilya. Tawan nin panahon na aboton an puso kan saindong mga aki. (Tal. 23:15) Mantang an dakol na pamilya ginagamit an okasyon na ini sa pag-andam para sa semanal na Pag-adal sa Torrengbantayan, paminsanminsan puwedeng nakapakokosog na konsideraron an partikular na pangangaipo kan pamilya. An paghapot nin mga hapot sa punto-de-vista asin paghinanyog sa mga komento kan lambang miembro nin pamilya makapagtotokdo patin makarerepresko. An pagkondukta nin pag-adal na napakikinabangan nin lambang miembro nin pamilya sarong tunay na angat sa payo nin pamilya. Pero dakol nanggad an balos kun an gabos nagtatalubo sa espirituwal! Paagi sa paggibong kalabot an gabos, an maogmang espiritu magdadanay.

²⁶ An saindong mamomoton, espesyalisadong pagsasanay ngonyan mahalaga sa pagligtas sa buhay kan saindong mga aki. (Tal. 22:6) Nasa isip ini, madaling masabotan na ini an puwedeng magin pinakamahalagang pagtotokdo na gigibohon nindo. Nungkang isipon na solo kamo sa espesyal asin importanteng gibohon na ini. Makanood na manarig na marhay ki Jehova para sa paggiya sa pag-asikaso kan saindong mga responsibilidad sa pamilya. Bako sana iyan. May iba pa na dakula man an ikatatabang.

²⁷ Kun Ano an Ikatatabang nin Iba: Puwedeng iiba kan mga magurang sa kongregasyon an mga hobenes, kaiba kan saindang mga magurang, sa paglinig sa Kingdom Hall. Dagkahon an mga aki sa mga pagtiripon sa kongregasyon. An mga magurang asin ministeryal na lingkod na asignado sa mga kabtang sa Pagtiripon sa Paglilingkod maninigong hanapon an mga kamot nin mga aki na nag-iitaas kun igwa nin mga kabtang na may partisipasyon kan mga nagdadangog. Hanapon an mga oportunidad na gamiton an marahay an halimbawang mga hobenes sa mga demonstrasyon kaiba kan saindang mga magurang. An iba puwedeng interbiohon asin magkomento nin halipot.

²⁸ Dai paglimanlimanan an saindang mga paghihingoa. An mga hobenes tunay nanggad na kayamanan sa kongregasyon. Paagi sa saindang marahay na gawe, an dakol ‘nasamnohan an katokdoan kan satong Paraligtas, an Dios.’ (Tito 2:​6-10) Magin mapagrisa sa pangangaipong tawan nin komendasyon an mga hobenes na nagpapartisipar minsan sa sadit na paagi. Dinadagka sinda kaini na mag-andam asin magmawot na otrohon iyan sa maabot. An siring na interes sa mga hobenes kan mga may edad na mahalagang marhay. Gurano kaparate na kamo bilang magurang o ministeryal na lingkod nagdolok sa mga hoben na miembro kan kongregasyon sa pagtao sainda nin komendasyon huli sa pahayag o demonstrasyon sa pagtiripon?

²⁹ Mga payunir, ano an magigibo nindo na tumabang? Taano ta dai repasohon an saindong iskedyul tanganing maheling kun paano ibabale an mga aking nag-eeskuwela sa saindong mga areglo sa hapon asin kun Sabado asin Domingo? Positibo daw nindong isinasaysay sainda an pagpili nindo sa pambilog na panahon na paglilingkod? Ipinaheheling daw nindo paagi sa ekspresyon kan saindong lalauogon na nagkakamit kamo nin kagayagayahan sa saindong ministeryo? Daing pagduwaduwa daw nindong irinirekomendar iyan sa iba, nangorogna sa mga hobenes? Kun naghuhulit sa harong-harong, an saindong pananaram daw nakapakokosog asin positibo? Kun iyo, sa siring bilang payunir kamo man nakihihiras sa mahalagang marhay na aktibidad na ini nin pagpapatood.

³⁰ An gabos sa kongregasyon maninigong magin mapagrisang marhay sa importanteng gibohon na ini nin pagsasanay sa mga hobenes. Puwede daw kamong gumibo nin depinidong mga areglo na ibanan sinda sa ministeryo sa langtad? Puwede daw kamong magpraktis nin sarong pag-aatubang kaiba ninda bilang preparasyon sa paghaharongharong? Alisto daw kamo sa mga oportunidad na dagkahon an espirituwal na mga aktibidad sa ngapit kun magkairibang naglilingkod sa ministeryo? An lambang parahayag maninigong risahon na minsan an sarong halipot na komento puwedeng pumukaw nin positibong kaisipan manongod sa pambilog na buhay na espirituwal na mga pasohan, para sa daing katapusan na pakinabang kan hoben.

³¹ An mga Hobenes Makatatabang sa Sainda Mismo: Mga hobenes, dinadagka mi an lambang saro saindo na danay na himateon an mga pagtotokdo ni Jehova asin isikwal an iinaalok kan kinaban. Padagos na baloon an saindong sadiri paagi sa pagsiyasat kan saindong gawe asin pan-irarom na mga saboot. Ano an kaisipan nindo manongod ki Jehova asin sa linalaoman nia sa saindo sa aroaldaw na pamumuhay? Linalabanan daw nindo nin maigot an impluwensia kan mga ideya ni Satanas? (1 Tim. 6:12) Mantang an mga tawo, asin partikular na an mga hobenes, natural na mawoton an pag-oyon nin mga kaedad, nanonompongan daw nindo an saindong sadiri na nasusugotan na sumunod sa kadaklan sa paggibo nin maraot? (Ex. 23:2) Nasabotan ni apostol Pablo na igwa nin grabeng pangigipit na umarog sa mga gibo kan kinaban.​—Roma 7:​21-23.

³² Nangangaipo nin kapusoan na tumangon an impluwensia kan kinaban, na gumawe nin laen kan sa kinabanon na mga kaedad, asin na himateon an mga pagtotokdo nin Dios. An mga tawo kan suanoy na mga panahon ginibo iyan na may dakulang kapangganahan. Horophoropa an kapusoan ni Noe. Kinondenar nia an bilog na kinaban paagi kan saiyang pagtubod asin pagdanay na siblag sa mga paragibo nin maraot kan saiyang panahon. (Heb. 11:7) Makilaban nin maigot huli ta bawi man an paghihingoa. Dai pag-arogon an mga maluya, matalaw, matatakton na nagsusunod sa kadaklan ni Satanas. Sa kabaliktaran, hanapon an pakiibaiba kan mga nakanonompong nin pag-oyon sa mga mata ni Jehova. (Fil. 3:17) Palibotan an saindong sadiri nin pag-iriba na mamartsa kasabay nindo pasiring sa ipinanugang bagong kinaban nin Dios. (Fil. 1:27) Papagdanayon sa isip na saro sana an dalan na minagiya pasiring sa buhay na daing katapusan.​—Mat. 7:​13, 14.

³³ Kun nakanonompong kita nin kagayagayahan sa pagheling sa mga hobenes na nagtatao nin pag-omaw asin onra sa satuyang Dios, orog pa nanggad na nagtatao ini nin kagayagayahan sa saiya! Mayong duwa-duwa na si Jehova naoogma sa pagmasid sa mga hobenes na igwang lubos na kabtang sa pagpahayag kan saiyang mamuraway na mga katuyohan. Sinda “mana” hale sa saiya, asin mawot nia an pinakamarahay sana para sa sainda. (Sal. 127:​3-5; 128:​3-6) Sa pagpabanaag kan interes kan saiyang Ama, si Cristo Jesus nakanompong nin dakulang kagayagayahan sa pakiibaiba sa saradit na aki, asin nagtao sia nin panahon na pakosogon sinda sa saindang pagsamba ki Jehova. Nagpaheling sia nin mamomoton na kapadangatan sa sainda. (Mar. 9:​36, 37; 10:​13-16) An pagheling daw niato sa satong mga hobenes kapareho kan pagheling sainda ni Jehova asin ni Cristo Jesus? An mga hobenes daw sa satong mga kongregasyon nakaaaram kun paano minamansay ni Jehova asin kan mga anghel an saindang kaimbodan asin marahay na halimbawa? Maninigo sindang tawan nin komendasyon asin dagkahon na paogmahon si Jehova paagi sa pag-aabot sa espirituwal na mga pasohan. Mga hobenes, aboton an mga pasohan na magbubunga nin mga bendisyon para sa saindo ngonyan asin sa ngapit.