An Yearbook—Tambobong nin mga Pampakosog
1 An mga bareta asin eksperyensia manongod sa makangangalas na mga gibo ni Jehova perming nakarerepresko sa mga lingkod nin Dios. (Job 38:4, 7; Tal. 25:25; Luc. 7:22; Gibo 15:31) Iyan an dahelan na an Yearbook of Jehovah’s Witnesses sarong tambobong nin mga pampakosog.
2 Ipinupublikar kan kada Yearbook an mga bareta hale sa bilog na kinaban dapit sa mga aktibidad kan mga Saksi ni Jehova. An nakapakokosog na mga eksperyensia nagtatampok kan paggiya, proteksion, asin bendisyon ni Jehova sa saiyang banwaan. Isinasaysay kan Yearbook an dapit sa mapusong mga lalaki asin babae na binayaan an pamilya, mga katood, asin sadiring nasyon tanganing darahon an mga katotoohan kan Biblia sa mga tawo sa gabos na kontinente.
3 Pinahiro kan Yearbook an dakol na parabasa na dugangan an saindang paglilingkod sa Dios. An sarong parabasa nagsurat: “Gusto ko kutanang matapos nang basahon iyan. An natapos ko nang basahon nakapakokosog nang gayo. Pinapamate kaiyan sako na kaya kong gumibo nin orog pa sa paghuhulit kan maogmang bareta kun naheheling ko an ginigibo nin iba sa irarom nin pangigipit.”
4 Kada taon poon kan 1927, an Yearbook of Jehovah’s Witnesses nagin tunay na tambobong nin nakaiinspirar na mga bareta asin eksperyensia. Lubos daw kamong nakikinabang sa pambihirang gikanan na ini nin pampakosog? Tanganing magibo iyan, siertohon na basahon an Yearbook pakakua tolos nindo kaiyan, na posibleng sa Enero o amay sa Pebrero. Dangan sa bilog na taon, repasohon an espisipikong mga kabtang kaiyan para sa pampakosog na kaipuhan nindo asin kan saindong pamilya.