Paadalan sa Ministeryal na Pagsasanay
1 Sa 1993 Yearbook, sa pahina 26 asin 27, ibinareta na ginigibo na an mga areglo sa pagpaabot kan mga pakinabang kan Paadalan sa Ministeryal na Pagsasanay sa ibang kadagaan. Naoogma kaming ibareta na an mga pakinabang na ini poponan nang makamtan digdi sa Pilipinas sa bulan nin Enero.
2 Sa Enero 6, 24 estudyante para sa enot na klase sa Pilipinas an maarabot sa pagpalista, asin an paadalan mismo mapoon sa Lunes, Enero 10. Gigibohon an paadalan sa Bethel asin magpapadagos sa laog nin walong semana sagkod sa Marso 5, 1994.
3 An siisay man na daing agom na mga magurang asin miisteryal na lingkod na interesadong umatender sa paadalan puwedeng umatender sa miting kaiba kan mga paraataman sa sirkito asin distrito sa pansirkitong asamblea. Sinda maninigong mga tugang na mayong pampamilya o pinansial na mga obligasyon asin maninigong may kakayahan na bumasa asin matibay magtaram nin Ingles. An dugang pang impormasyon manongod sa katuyohan kan paadalan asin mga kahagadan na kaipuhan na maotob tanganing magin kuwalipikado sa pagpalista itatao sa pansirkitong asamblea.
4 Poon kan pagbubukas kan Paadalan sa Ministeryal na Pagsasanay sa Estados Unidos kan 1987, an Yearbook nagkaigwa nin haralipot na bareta manongod sa progreso kan paadalan asin ipinaheling kun paano an mga naggraduwar mas nasasangkapan na asikasohon an mga paninimbagan asin an asignasyon na itinao sa sainda. Dakol an mabalik sa saindang sadiring mga kongregasyon, kun saen ikaaaplikar ninda an nanodan ninda asin matatabangan man an iba na umoswag sa pagkapot kan saindang mga paninimbagan. May pira na tibaad hagadan na tabangan an ibang kongregasyon kun saen dakula an pangangaipo.
5 Tunay na sarong pribilehiyo para sa Pilipinas na gibohon an siring na paadalan asin nasisierto mi na makakokontribuwir iyan nin dakula sa pagtalubo sa ngapit asin espirituwalidad sa nasyon na ini.