Ma-auxiliary Payunir daw Kamo sa Nobyembre o Disyembre?
1 Pinakosog ni Jesus an saiyang mga parasunod na magboluntaryo kan saindang sadiri sa ministeryo, asin inasegurar nia sinda na an paggibo kaini magtatao sainda nin kaogmahan asin dakol na espirituwal na bendisyon. (Mat. 10:8b; Gibo 20:35) Kan nakaaging Nobyembre 2,307 indibiduwal sa Pilipinas an nagkamit kan mga bendisyon nin nadagdagan na aktibidad bilang mga auxiliary payunir, mantang kan nakaaging Disyembre 4,307 an nakikabtang sa gibohon na ini. Puwede daw kamong magpalista bilang auxiliary payunir durante magsalang sa Nobyembre o Disyembre o tibaad sa duwang bulan?—Sal. 34:8.
2 Durante kan mga bulan na ini an kamugtakan kan panahon parateng mas marahay pakatapos kan tig-oran asin durante kan Disyembre nangorogna ta igwa nin mga piyesta opisyal sa eskuwelahan na makakagibong mas pasil an pag-auxiliary payunir. Dawa ngani an pandistritong mga kombension gigibohon sa huri kan Disyembre, minsan siring igwa pa nin tolong semana sa bulan na puwedeng magamit sa pag-auxiliary payunir.
3 Taano ta dai gumibo nin positibong mga plano ngonyan na mag-auxiliary payunir sa Nobyembre asin Disyembre? Tanganing magin mapanggana, kaipuhan an maingat na pagplano. Makipag-olay sa iba na nagpayunir maski ngani igwa sinda nin sekular na mga trabaho asin paninimbagan sa pamilya. Makikinabang kamo sa saindang eksperyensia. Siring man, dumolok ki Jehova sa pamibi, na hinahagad an saiyang tabang.—Isa. 40:29-31; Sant. 1:5.
4 Kun mapupuwede para sa nagkapirang magurang asin ministeryal na lingkod na mag-auxiliary payunir, iyan magigin pampakosog sa iba kun iaanunsiar an pagnombrar sainda bago an katapusan kan Oktubre. Sa parate napapakosog an mga tugang na magpalista kun aram ninda na igwa nin mga tugang na lalaki na mangengenot asin na dai sinda magsosolo sa saindang pagpapayunir.
5 Mayong kustion dapit dian, dakol an kagayagayahan kan mga nag-aareglong maglingkod bilang auxiliary payunir. Puwede daw nindong kamtan an pribilehiyong ini durante kan Nobyembre asin Disyembre? Kun gigibohon nindo an paghihingoa na pahiwason an saindong pribilehiyo na paghiras kan maogmang bareta sa iba, siertong bububoan kamo ni Jehova nin mayaman na bendisyon.—Mal. 3:10.