Pagpapadanay sa Satong Pagkasararo sa Kahadean
1 Ano an pagkasararo sa Kahadean, asin paano niato iyan mapagdadanay? An Kahadean nin Dios iyo an tema kan bilog na Biblia. An Kahadean na iyan sarong tunay na gobyerno, na igwang kapangyarihan asin autoridad. Iyan an tema kan paghuhulit ni Jesus. (Mat. 4:17) An pagdadanay na dayupot sa organisasyon ni Jehova, pag-otob kan sugo sa sato na paghuhulit, asin pagdadanay na siblag sa kinaban pinangyayari kitang mapagdanay an satong pagkasararo sa Kahadean. Paagi sa satong mga hiro asin tataramon, ipinaheheling niato na nasa lado kita kan Kahadean.—Juan 18:37.
2 Poon kan 1914, nagin nang tunay an Kahadean para sa minilyon na sakop kaiyan. An pagkasararo na ipinaheheling kan mga sakop na ini kan Kahadean kabaliktaran na gayo sa sarong nababangang kinaban. Dapat niatong gibohon na tunay an Kahadean sa satong buhay kun boot niato iyan na magin puwersang nakapagpapasaro. Ano an minagibo dian na tunay para sa sato?
3 Siring sa ibang gobyerno, an Kahadean igwang mga pagboot. Minsan siring, napapalaen iyan ta an mga pagboot kaiyan nakukua sa Biblia. An personal na pag-adal sa Biblia asin sa mga publikasyon gikan sa “maimbod asin madonong na oripon” tinatabangan kitang iaplikar an mga pagboot nin Dios sa satong aroaldaw na buhay. (Mat. 24:45) Mantang ginigibo niato ini, nagigin tunay na marhay an Kahadean para sa sato, na pinagsasararo kita, ginigibo kitang nagkakasararong pamilya nin mga parasamba na sakop kan pamamahala ni Jesus.
4 Pagkasararo Paagi sa Paghuhulit kan Kahadean: An satong “oroyon” na paghuhulit kan Kahadean pinagsasararo kita mantang naghihingoa kitang ‘pamurawayon’ si Jehova. (Roma 15:5, 6) An maigot na pakikikabtang sa satong mga kapwa trabahador sa bilog na daga pinakokosog an satong pagtubod asin tinotogotan an espiritu ni Jehova na humiro sa sato sa pag-otob kan saiyang kabotan. An pagigin “dakol an gigibohon sa gibohon kan Kagurangnan” ginigibo kitang “marigon, dai natatanyog.”—1 Cor. 15:58.
5 Sa dakol na nasyon, pinagmamaigotan ni Satanas na raoton an satong pagkasararo paagi sa pakikiaram sa satong paghuhulit. Ginagamit nia an gabos na makakaya nia na makapalakop nin dai pagkaoroyon asin magpangyari nin mga dai pagkasinabotan, tanganing makaprodusir nin pasuruhay asin iriwal. (Tal. 6:19; Gal. 5:19-21, 26) Boot nia kitang makilabot sa mga iriwal sa kinaban asin kumampi sa politikal asin sosyal na mga isyu. (Sant. 3:14-16) Dinadagka kita kan Kasuratan na labanan an saiyang impluwensia; ta kun dai, sisibaon nia kita bilang saiyang biktima. (1 Ped. 5:8, 9) An katunayan kan paglaom sa Kahadean dai dapat na togotan na mawara sa satong puso asin isip.
6 Kun minalataw an mga kadepisilan, nangorogna kun kalabot dian an satong mga tugang, kaipuhan niatong ipaheling an mga bunga nin espiritu tanganing mapagdanay an katoninongan. An mga ugale nin kinabanon, siring baga kan kapalangkawan, asin pagkauri, nakakapabanga asin kaipuhan na mapangganahan. (Efe. 4:1-3; Col. 3:5-10, 12-14) An Kahadean sarong katunayan sa satong buhay! Pero kaipuhan kitang magin mapagbantay tanganing mapagdanay iyan na siring.—Efe. 6:11, 13.
7 An katunayan kan satong makangangalas na paglaom sa Kahadean binobogkos kita sa espiritu nin pagkasararo na nungkang matatapos.—Sal. 133:1.