Kamo Maninigong Magin Anong Klaseng mga Tawo?

¹ Naghaharani na an panahon nin pagpanimbag sa bilog na katawohan. Iyan an panahon na gigibohon an paghokom nin Dios tumang sa mga maraot; iyan panahon man nin kaligtasan para sa mga matanos. An gabos na tawong nabubuhay sa panahon na iyan papaninimbagon sa kun paano sinda namuhay. Nasa isip iyan, si Pedro naghapot: “Kamo maninigong magin anong klaseng mga tawo”? Idinodoon nia an halaga nin ‘banal na mga gawe, gibo nin diosnon na debosyon, asin paggirumdom sa aldaw ni Jehova,’ siring man an pangangaipo na magin ‘daing digta, dai nin kanawayan, patin nasa katoninongan.’​—2 Ped. 3:​11-14.

² Banal na mga Gawe Asin Gibo nin Diosnon na Debosyon: Kaiba sa banal na gawe an mga gibo na nagpapaheling nin paggalang sa mga prinsipyo sa Biblia. (Tito 2:​7, 8) Dapat na likayan nin sarong Kristiano an kinabanon na gawe na minomotibar nin paslo, makalaman na mga pagmawot.​—Roma 13:​11, 14.

³ An “diosnon na debosyon” sinasabing “personal na kadayupotan sa Dios, na naggigikan sa puso na pinupukaw nin hararom na pag-apresyar sa saiyang nakaaakit na mga kualidad.” An satong kaigotan sa ministeryo sarong paagi nin pagpaheling niato kan kualidad na ini. An satong motibo sa paghuhulit bako sanang obligasyon; iyan naggigikan sa hararom an pagkatadom na pagkamoot ki Jehova. (Mar. 12:​29, 30) Huling minomotibar kan siring na pagkamoot, an pagheling niato sa satong ministeryo kapahayagan kan satong diosnon na debosyon. Maninigo na dayaday an satong pakikikabtang sa paghuhulit. Iyan maninigong magin mahalagang kabtang kan satong semanal na iskedyul nin aktibidad.​—Heb. 13:15.

⁴ An ‘paggirumdom’ sa aldaw ni Jehova nangangahulogan nin pagpadanay kaiyan na pangenot sa satong mga iniisip sa aroaldaw, na dai iyan noarin man ginigibong segunda. Nangangahulogan iyan nin pagpapadanay kan intereses kan Kahadean na enot sa satong buhay.​—Mat. 6:33.

⁵ Daing Digta, Dai nin Kanawayan, Patin Nasa Katoninongan: Bilang kabtang kan dakulang kadaklan, kita ‘naghugas kan satong mga gubing asin pinaputi iyan sa dugo kan Kordero.’ (Kap. 7:14) An pagigin “daing digta” nangangahulogan na iniingatan niato an satong malinig, dusay na buhay na dai matipsikan nin mga ati gikan sa kinaban. Pinapagdadanay niatong “daing kanawayan” an satong sadiri paagi sa dai pagtogot na raoton nin maraot, materyalistikong mga kamawotan an satong Kristianong pagkatawo. (Sant. 1:27; 1 Juan 2:​15-17) Ipinaheheling niato na kita namumuhay sa “katoninongan” paagi sa pagpabanaag kan “katoninongan nin Dios” sa gabos niatong pakiibaiba sa iba.​—Fil. 4:7; Roma 12:18; 14:19.

⁶ Kun kita mapangganang nag-iingat na dai maolakitan kan kinaban, an satong marahay na mga gibo matabang sa iba na maheling an kalaenan “kan naglilingkod sa Dios asin kan dai naglingkod sa saiya.”​—Mal. 3:18.

⁷ Napamumuraway an ngaran ni Jehova, napakokosog an kongregasyon, asin nakikinabang an iba kun kita maingat na nagpapadanay nin “marahay na mga gibo.” (1 Ped. 2:12) Permi logod kitang magin siring kaiyan na klase nin tawo.