Pag-alok kan The Greatest Man Who Ever Lived
1 Ngonyan na Disyembre iaalok giraray niato an librong Greatest Man sa mga tawo sa satong teritoryo. Dakol na tawo an nag-iisip-isip dapit ki Jesus durante kan panahon na ini kan taon asin sa siring tibaad naoogmang magbasa kan estorya kan saiyang buhay digdi sa daga. Ano an puede niatong sabihon tanganing mapukaw an interes?
2 Uya an sarong pag-atubang na puedeng makapukaw nin interes durante kaining bulan nin Disyembre:
◼ “An kadaklan na tawo tinokdoan na si Jesus namundag kan Disyembre 25 asin na sinongko sia kan tolong mago sa panahon na iyan. Iyan daw an saindong paniniwala? [Pasimbagon.] Digdi sa librong ini sa kapitulo 5 maheheling nindo an ilustrasyon kan saiyang pagkamundag. [Ipaheling an ilustrasyon asin basahon an huring parapo.] Mapadapit sa tolong mago, tibaad interesado kamo sa ilustrasyon na ini sa kapitulo 7. May naririsa daw kamong pagkakalaen sa duwang ilustrasyon? [Ipaheling an retrato sa toong pahina asin idoon na dakula na si Jesus sa panahon na ini.] An librong ini nagtatao nin tamang paglaladawan sa buhay asin ministeryo ni Jesus. Tanganing maogma kamo dian, naoogma akong ialok sa saindo an librong ini sa dikit na kontribusyon.”
3 Nasa isip an sarong dai pa sana nahahaloy na makamomondong bareta, puede kamong magsabi:
◼ “Posibleng nadangog nindo an manongod sa [sambiton an pangyayari]. Napag-isip-isip na daw nindo kun taano an siring na mga bagay ta nangyayari ngonyan? [Pasimbagon.] Nasusurat sa Biblia an simbag ni Jesus sa siring na hapot, asin digdi sa kapitulo 111 kan librong ini ipinaliliwanag kaiyan na an siring na mga pangyayari tanda kan huring mga aldaw. [Ipaheling an ilustrasyon sa enot na pahina dangan basahon an huring parapo sa ikaduwang pahina, o basahon an Mateo 24:7, 8 sa saindong Biblia.] Maninigo daw niatong ikatakot ini? Dai, huli ta iyan nangangahulogan na sa dai na mahahaloy lalaglagon nin Dios an gabos na karatan asin dadarahon an sarong bagong kinaban. [Basahon an 2 Pedro 3:13.] Sa kontribusyon na ₱60.00 mapapasaindo an sarong kopya tanganing mabasa nindo mismo an dapit dian.”
4 Kun nakanompong kamo nin sarong magurang, puede nindong isentro an atension sa pamilya:
◼ “An kadaklan na magurang minaoyon na dakol an problema sa pagmamaigot na mamantenir an sarong maogmang buhay pampamilya. Ano an naoobserbaran nindong magabat na mga kaolangan? [Pasimbagon.] An kadaklan sa sato naggigibo kan satong pinakamakakaya, alagad parate niatong pinahahalagahan an pag-asistir na matabang sa sato na magkaigwa nin mas marahay na mga resulta. An Biblia nagtatao nin ekselenteng sadol. [Basahon an mga kabtang kan Colosas 3:12, 18-21.] An librong ini, na The Greatest Man Who Ever Lived, sa kapitulo 95, nagpapaheling na si Jesus nagtao nin marahay na leksion manongod sa pag-agom asin sa pagpadakula sa mga aki. [Buksan an libro asin ipaheling an ilustrasyon.] Sierto akong maoogma kamong basahon an librong ini tanganing makanood nin orog pa kan praktikal na mga katokdoan ni Jesus.”
5 Kun andam kitang marhay, puede niatong magamit an librong ini sa ‘pagbukas kan Kasuratan’ sa iba sa paagi na magtatao sa sainda nin dakulang kagayagayahan!—Luc. 24:32.