Paano Ko Mapahihinanyog an Kagharong?
1 Sa siudad nin Filipos, “an sarong babae na an ngaran Lidia, paratinda nin purpura, . . . naghihinanyog, asin binukasan ni Jehova an saiyang puso tanganing maghinanyog sa mga bagay na itinataram ni Pablo.” (Gibo 16:14) Ano an itinotokdo sa sato kan talang ini? An paghinanyog minagiya sa pakanood nin saro kan katotoohan. An satong kapangganahan sa paghiras kan mensahe nin Kahadean sa pangenot minadepende sa pagigin andam kan kagharong na maghinanyog. Oras na mapahinanyog niato sia, bako nang masakit na iatubang an satong mensahe. Pero an pagpahinanyog sa saro puedeng magin angat. Ano an puede niatong gibohon?
2 Bago makikabtang sa paglilingkod, maninigo niatong tawan nin atension an satong itsura asin an kasangkapan na gagamiton niato. Taano? Mas may tendensiang maghinanyog an mga tawo sa saro na iinaatubang an saiyang sadiri na may dignidad. An sulot daw niato magayon pero mabini? Maski ngani an pagigin pabaya sa pagbado tibaad popular sa kinaban, linilikayan niato an siring na kadaihan nin pag-iingat huli ta kita mga ministro na nagrerepresentar sa Kahadean nin Dios. An satong malinig asin aregladong itsura nakadadagdag nin paborableng patotoo sa mensahe kan Kahadean na satong ihinuhulit.
3 Magin Makikatood Asin Magalang: Sa ibong kan pabarobagong mga kaisipan ngonyan, dakol pang tawo an iginagalang an Biblia asin maghihimate sa sarong magalang asin makikatood na pag-orolay manongod sa laog kan Biblia. An mainit, tunay na huyom puedeng gibohon na pamugtak an boot kan kagharong asin magbukas kan dalan para sa sarong marahay na orolay. An satong sinseridad asin marahay na mga ugale maninigong mabanaag man sa satong pagtaram asin paggawe, na kabale an satong magalang na paghinanyog sa mga sinasabi kan kagharong.
4 An satong katuyohan iyo na ihiras sa iba an paglaom sa Biblia. Isinasaisip ini, maninigo niatong seguradohon na an satong pag-orolay nakaaakit, bakong nakiiiwal o nan-aangat. Dai kaipuhan na magsayang nin oras sa pakiaargumento sa saro na malinaw na nagkokontra. (2 Tim. 2:23-25) Puede kitang pumili sa dakol na laen-laen na nakaparirigon sa boot asin napapanahon na mga pag-atubang na itinatao sa sato sa An Satong Ministeryo sa Kahadean asin sa librong Reasoning. Siempre, kaipuhan niatong andamon na marhay an mga ini tanganing makataram kita sa mainit asin nakakokombensir na paagi.—1 Ped. 3:15.
5 Pakasongkoa niato, pipira sanang kagharong an eksaktong makagigirumdom kan satong sinabi. Minsan siring, haros sinda gabos makagigirumdom kan paagi na itinaram iyan. Dai niato maninigong menuson an puersa nin karahayan asin kabootan. Sierto nanggad na dakol an arog-karnerong tawo sa satong teritoryo na gikan sa boot na maghihinanyog kan katotoohan arog kan ginibo ni Lidia kan enot na siglo. An pagtao nin maingat na atension sa satong itsura asin paagi nin pagtaram puedeng makaparigon sa boot kan mga sinsero na maghinanyog sa Tataramon nin Dios asin akoon iyan.—Mar. 4:20.