Magin “Maigot sa Marahay na mga Gibo” Ngonyan na Abril!
1 Ngonyan na Abril, an pasohan niato iyo na makapakikabtang sa ministeryo an gabos na parahayag. Magigin nakakaparigon nanggad kun an lambang parahayag sa nasyon na ini makakapakikabtang sa paghuhulit bago matapos an Abril. Mantang presko pa sa isip an Memorial kan kagadanan ni Cristo, seguradong gusto niatong ipaheling an satong apresasyon sa karahayan nin Dios paagi sa pagdolot nin direktang “atang nin pag-omaw” sa ministeryo sa langtad.—Heb. 13:15.
2 Sa natatada pang kabtang kan bulan na ini nin Abril, maninigong maigot na maghingoa na batidon an mga pangangaipo kan lambang miembro kan kongregasyon tanganing an gabos maigot na makapakikabtang bago matapos an bulan. (Roma 15:1) An mga paraataman sa pag-adal sa libro maninigong lubos na nakakaaram kan mga kamugtakan kan mga kagrupo ninda asin magtao nin praktikal na tabang kun kaipuhan. Igwa daw nin siisay man na nagkakaipo nin transportasyon? Siisay an puedeng makapagtao kaiyan? May nagkapira daw na masusupgon? Puede daw na ibanan sinda nin mas eksperyensiadong mga parahayag? Paano man an mga may helang o maluya an hawak? Puede daw sindang magpatotoo paagi sa telepono, pagsurat, o iba pang mabungang aktibidad?
3 An nagkapira na nagin inaktibo puedeng mamotibar kan paghinanyog ninda sa pahayag sa Memorial sa Abril 12. Sa siring marahay na gumibo nin espesyal na paghihingoa na dolokon an siisay man na inaktibo na maatender sa Memorial asin sabihon na madalaw sa sainda asin tibaad konduktahan sinda nin pag-adal sa Biblia. Pagkatapos kan Memorial, tibaad mapahiro sinda na magin aktibo liwat asin makikabtang giraray sa ministeryo.
4 Sanayon an mga Aki na Makikabtang: Dakol na aki kan Mga Saksi ni Jehova an dakol nang taon na nag-iiba sa saindang mga magurang sa pagharongharong, minsan ngani dai pa sinda naglilingkod bilang dai pa bautisadong mga parahayag. Ini na daw an panahon na sinda pumoon? Napapahiro daw sinda gikan sa puso asin andam na magkaigwa nin makahulogan na pakikikabtang sa pagharongharong? Makakatabang para sa mga payo kan pamilya na repasohon an parapo 1 asin 2 sa pahina 82 kan librong Organisado kun dinedeterminaran kun baga kualipikado na an saindang mga aki na magin mga parahayag dangan sunodon an prosedimiento na sinabi dian.
5 Ginigibo kan Kualipikadong mga Inaadalan sa Biblia an Ginibo ni Jesus: Dai linimitaran ni Jesus an saiyang pagtotokdo sa pagtao sana nin instruksion manongod sa doktrinal na mga bagay. Inibanan nia sa ministeryo an saiyang mga estudyante asin tinokdoan nia sinda kun paano maghuhulit. (Luc. 8:1; 10:1-11) Ano an situwasyon ngonyan? Labing sanggatos mil na pag-adal sa Biblia an kinokonduktahan digdi sa Pilipinas. Mayong duwa-duwa na paagi sa angay na pagparigon sa boot, dakol sa mga inaadalan na ini sa Biblia an makakagibo kan sunod na tangga sa pagsasanay sa sainda asin makukualipikar na maglingkod bilang dai pa bautisadong mga parahayag ngonyan na Abril.
6 Kun kamo nagkokondukta nin pag-adal sa Biblia, konsideraron an mga hapot na ini: Nag-ooswag daw an inaadalan sa Biblia, segun sa saiyang edad asin abilidad? Pinonan na daw niang impormal na sabihon sa iba an saiyang pagtubod? Sia daw nagsulog na kan “bagong personalidad”? (Col. 3:10) Naaabot na daw nia an mga kualipikasyon para sa dai pa bautisadong mga parahayag, na yaon sa pahina 79-81 kan librong Organisado? Kun sa heling nindo sia kualipikado na, taano ta dai ipakipag-olay sa saiya an bagay na iyan? May mga inaadalan sa Biblia na an kaipuhan sana direktang agdahon na makikabtang sa gibohon. Siempre, kun gusto na kan inaadalan sa Biblia, siring kan dati kaipuhan nguna kan nangengenot na paraataman na iareglo na kaolayon sia nin duwang magurang sa kongregasyon. Sa ibong na lado, tibaad may nakakapogol sa inaadalan sa Biblia. Tibaad an saro sa kamagurangan puede kamong ibanan sa inaadalan sa Biblia asin aaramon nia an saboot kaini dapit sa katotoohan. Pakatapos maghinanyog sa sasabihon kan inaadalan sa Biblia, an magurang sa kongregasyon puedeng makapagtao nin praktikal na mga suhestion, kaiba an sono sa Kasuratan na tabang.
7 ‘Tuboson an Angay na Panahon’ Tangani na Mag-auxiliary Payunir: Kada taon sa panahon kan Memorial, an pagpasalamat sa pantubos nagpapahiro sa rinibo na ‘tuboson’ an panahon tangani na magin mga auxiliary payunir. (Efe. 5:15-17) Minsan ngani kaipuhan an nagkapirang pagsasakripisyo, dakula an balos. An kaomaw-omaw na kabilangan nin mga hoben inaaprobetsaran an bakasyon sa eskuelahan tangani na mag-auxiliary payunir. An mga nasa edad na na nagtatrabaho nin bilog na panahon lubos na inaaprobetsaran an mga banggi asin katapusan kan semana sa iyo man sanang aktibidad na ini. Mantang an Abril ngonyan na taon igwa nin limang Sabado asin limang Domingo, mayong duda na dakol an makakagibo kaini. Kun kamo dai nakapalista ngonyan na Abril, taano ta dai pag-isipan kun puede kamong makapag-auxiliary payunir sa Mayo tangani na kultibaron an interes na nanompongan ngonyan na Abril?
8 Baga man kaya nindong mag-auxiliary payunir o dai, humanap nin mga paagi na dagdagan an saindong paglilingkod sa langtad ngonyan na Abril. Magbugtak nin personal na pasohan para sa saindong sadiri, pasohan na mangangaipo nin darudakulang paghihingoa tanganing maabot alagad kayang aboton. Bebendisyonan ni Jehova an pagmawot nindo na ‘maggamit kan saindong sadiri asin lubos na magpagamit’ sa paglilingkod sa saiya segun sa saindong personal na mga kamugtakan.—2 Cor. 12:15.
9 Mga Pagtiripon Bago Maglingkod sa Langtad: An mga pagtiripon bago maglingkod sa langtad maninigong iareglo aroaldaw kun posible ngonyan na Abril. Maninigo man na gumibo nin areglo para sa paghuhulit sa banggi. An kadaklan na parahayag makikikabtang sa paglilingkod sa langtad sa katapusan kan semana, kaya an mga kongregasyon maninigong mag-iskedyul nin mga pagtiripon bago maglingkod sa langtad kun Sabado, pareho sa aga asin sa hapon.
10 Kamagurangan—Kaipuhan an Maingat na Pagplano: Kun posible, marahay kun mahuhulitan an gabos na teritoryo kan kongregasyon ngonyan na bulan nin Abril asin sa Mayo. Maninigong tawan nin espesyal na atension an paghuhulit sa arin man na komersial na teritoryo na asignado sa kongregasyon. An mga naghuhulit dian maninigong andam na marhay asin husay an gubing. Dai kaipuhan an detalyadong pag-atubang. Kun minadolok sa sarong negosyante, puede nindong sabihon na sa parate dai nindo nanonompongan sa harong an mga negosyante, kaya nagdadalaw kamo sa lugar kan saiyang negosyo tangani na iatubang an sarong artikulo na seguradong magigin interesante para sa saiya. Dangan puede na nindong sabihon sa halipot an sarong espesipikong punto sa magasin. An paghuhulit sa tinampo paagi sa mga magasin maninigo man na organisaron nin tama sa laog kan teritoryo kan kongregasyon. Tibaad igwa nin iba pang lugar sa teritoryo nindo na puedeng hulitan ngonyan na Abril, arog kan mga aeropuerto, ospital, paradahan, parke, asin erokan para sa mga gurang na. Maninigong determinaran kan grupo nin kamagurangan kun anong angay na mga areglo an puedeng gibohon para sa paghuhulit sa mga lugar na ini kan teritoryo kan saindong kongregasyon.
11 Si Jehova daing kapagalan sa paggibo. (Juan 5:17) Linalang nia an kalangitan asin an daga siring man an mga tinanom asin an mga hayop; alagad nagpadagos sia sa paggibo sagkod na lalangon nia an pinakalataw na nagibo nia sa daga—an tawo. An bagay na kita may buhay direktang resulta kan pagigin andam nin Dios na gumibo. Bilang “mga paraarog sa Dios,” maninigo kitang mapahiro kan satong pagkamoot sa saiya na magin “maigot sa marahay na mga gibo.” (Efe. 5:1; Tito 2:14) Maninigo kitang magin interesado na gumibo nin de kalidad sa ministeryo, huling si Jehova angay na mag-ako kan satong pinakamarahay nanggad na paghihingoa asin huling karakteristiko nin tawong maigot an pagmawot na magkamit nin mga bunga. Siempre, inaapresyar ni Jehova an ano man na pagsasakripisyo niato para sa saiya, asin dai noarin man magigin sayang sana an satong gibohon. (1 Cor. 15:58) Kaya, may mapagpasalamat na puso, gamiton niato an satong sadiri sa maigot na aktibidad ngonyan na Abril, na may kompiansa sa pag-oyon asin bendisyon ni Jehova patin sa nagsosopay na kapangganahan!