Isinugo Kita
1 Pinagbotan ni Jesus an saiyang mga parasunod na ‘gumibo nin mga disipulo sa mga tawo kan gabos na nasyon.’ (Mat. 28:19) Sa 232 na kadagaan asin mga grupo nin isla sa palibot kan daga, labing limang milyon na paraomaw ki Jehova Dios an nagtatao nin buhay na patotoo sa kaotoban kan pagboot ni Jesus. Alagad kumusta man kita personalmente? Odok daw niatong inaako an sugo na maghulit?
2 Sarong Moral na Obligasyon: An sugo “sarong pagboot na gibohon an idiniktang mga akto.” Pinagbobotan kita ni Cristo na maghulit. (Gibo 10:42) Narealisar ni apostol Pablo na nagtao ini sa saiya nin sarong pangangaipo, o moral na obligasyon. (1 Cor. 9:16) Bilang ilustrasyon: Imahinara na saro kamong tripulante sa sarong nalulunod na barko. Pinagbotan kamo kan kapitan na patanidan an mga pasahero asin giyahan sinda pasiring sa mga lantsa-salbabida. Iignorohon daw nindo an pagboot na iyan asin hihingoahon sanang iligtas an saindong sadiri? Dai nanggad! Namemeligro an buhay nin iba! May moral na obligasyon kamo na otobon an sugo sa saindo na tabangan sinda.
3 Sinugo kita nin Dios na magtao nin patanid. Sa dai mahahaloy tataposon na ni Jehova an bilog na maraot na palakaw na ini nin mga bagay. Minilyon na buhay an namemeligro! Tama daw na ignorohon niato an peligro sa iba asin isipon sana an dapit sa pagligtas sa satong sadiri? Siempre dai! May moral na obligasyon kita na tumabang na iligtas an buhay nin iba.—1 Tim. 4:16.
4 Maimbod na mga Halimbawa na Dapat Arogon: Si propeta Ezequiel nakamate nin paninimbagan na magtao nin nagpapatanid na mensahe sa bakong fiel na mga Israelita. Pinatanidan sia ni Jehova manongod sa mga kaaabtan kun dai nia otobon an asignasyon sa saiya: “Kun sabihan ko an sarong maraot, ‘Totoong gayong magagadan ka,’ asin dai mo sia patanidan . . . , sia mantang maraot, sa saiyang kasalan sia magagadan, alagad an saiyang dugo hahagadon ko sa saimong sadiring kamot.” (Ezeq. 3:18) Maimbod na inotob ni Ezequiel an sugo sa saiya maski sa atubangan nin grabeng paglamag. Kun siring, makapaggagayagaya sia kun otobon na an mga paghokom ni Jehova.
5 Pakalihis nin mga siglo, nagsurat si apostol Pablo manongod sa saiyang paninimbagan na maghulit. Ipinahayag nia: “Malinig ako sa dugo kan gabos na tawo, huli ta dai ako nagpogol sa pagsabi sa saindo kan gabos na sadol nin Dios.” Naghulit si Pablo sa publiko asin sa harong-harong huli ta aram nia na an dai pakaotob kaiyan nakagibo kutana sa saiya na may kasalan sa dugo sa atubangan nin Dios.—Gibo 20:20, 26, 27.
6 Igwa daw kita kan kaigotan ni Ezequiel? Napahihiro daw kitang maghulit siring kan ginibo ni Pablo? Rinibo pa an puedeng maghimate sa mensahe kan Kahadean asin makapahahayag: “Maiba kami sa saindo, huli ta nabaretaan niamo na an Dios yaon dian sa saindo.” (Zac. 8:23) An sato logod na pagkamoot sa Dios asin sa satong kapwa magmotibar sa sato na dai sumuko. Isinugo kita na maghulit!