Kanigoan Karahay na Pirmeng Umatender!
1 Sa laog nin dakol na dekada sa Sirangan na Europa, an dakol sa satong mga tugang prinohibiran na magtiripon sa publiko. Imahinara an saindang kagayagayahan kan haleon an mga pagprohibir asin sinda puede nang magtiripon na may katalingkasan!
2 Manongod sa saiyang pagdalaw sa saro kan kongregasyon na iyan, nagsurat an sarong paraataman sa sirkito: “Kan Martes na banggi, sa pagpoon mismo kan sakong pagdalaw, naraot an sistema sa pagpainit. Sa luwas, nagdadanay na malipoton an temperatura, asin sa laog, mga 5° C. sana. Nakaturukaw an mga tugang na nakasulot kan saindang mga gubing na panlipot, baliog, guantis, kupya, asin botas. Mayo nin makasubaybay sa Biblia, huli ta imposibleng mabuklat an mga pahina. Mantang nakatindog ako sa plataporma na nakaamerikana, nanonoog ako huli sa lipot, asin kada pagtaram ko, naheheling ko an sakong hinangos. Alagad an hinangaan ko iyo na mayo akong nadangog ni sarong reklamo. An gabos na tugang nagsabi na kanigoan kaogma asin karahay na makaatender!” An mga tugang na idto dai ngani nag-isip na paltahan an pagtiripon na idto!
3 Iyan daw an Satong Saboot? Pinakamamahal daw niato an oportunidad na sueltong makapagtiripon sa satong semanal na mga pagtiripon? O binabali-wala daw niato an mga pagtiripon kun paborable an mga kamugtakan? Tibaad bakong pasil an regular na pag-atender sa mga pagtiripon, asin tibaad may mga panahon na igwa kita nin lehitimong dahelan na dai makaatender. Pero, dai noarin man paglingawan na igwa sa tahaw niato na sa ibong nin paggurang, grabeng mga problema sa salud, pisikal na diperensia, mapagal na iskedyul sa trabaho, asin iba pang magabat na mga paninimbagan an nakasasabot kan importansia nin mga pagtiripon asin haros pirmeng nag-aatender. Abaa karahay na mga halimbawa na dapat niatong arogon!—Ikomparar an Lucas 2:37.
4 Ugaleon niatong suportaran an tunay na pagsamba paagi sa pag-atender sa gabos niatong Kristianong pagtiripon, poon sa sadit na grupong pag-adal sa libro sagkod sa dakulang kombension. Taano ta maninigo niatong isaboot na marhay an pag-atender sa mga pagtorotiripon na ini? Huli ta pagboot nin Dios na kita magtiripon. Alagad igwa nin iba pang importanteng mga dahelan. Kita gabos nangangaipo kan mga pakinabang sa pagtotokdo nin Dios asin kan tabang nin banal na espiritu, na inaako sa mga pagtiripon. (Mat. 18:20) Kita naparirigon paagi sa pagriribayan nin pamparigon sa boot kun nakikiibaiba sa mga tugang niato.—Heb. 10:24, 25.
5 Sa transpigurasyon, nagsabi si Pedro, “Paratokdo, marahay na kita mag-ontok digdi.” (Luc. 9:33) Maninigo na siring man kaiyan an satong saboot sa gabos niatong Kristianong pagtiripon. Tunay nanggad, kanigoan karahay na pirmeng umatender!