Pambilog na Kinaban na Pagselebrar kan Kagadanan ni Cristo
1 Tinawan kita ni Jehova nin dakol na balaog. An kabilogan kan saiyang karahayan asin mamomoton na kabootan malinaw na ilinaladawan bilang “saiyang dai ikaladawan na daing bayad na balaog.” Iyo, an “dai na kutana maninigong kabootan nin Dios” makangangalas na marhay kaya dai niato iyan kayang iladawan.—2Cor. 9:14, 15.
2 An Saiyang Kadarudakulaing Balaog: Si Jesu-Cristo, bilang Paratubos kan katawohan, iyo an kadarudakulaing balaog sa gabos. Sa pagpahayag kan saiyang dakulang pagkamoot sa kinaban nin katawohan, itinao ni Jehova an saiyang namomotan asin bugtong na Aki. (Juan 3:16) An siring na dai na kutana maninigong bendisyon hale sa Dios angay na selebraron sa bilog na kinaban. Noarin asin paano? Sa banggi kan Huebes, Abril 1, 1999, seselebraron kan mga Kristiano sa bilog na kinaban an Pamanggihan nin Kagurangnan, na sineselebrar an Memorial kan kadarudakulai sa gabos na atang.—1 Cor. 11:20, 23-26.
3 Si Cristo nagadan para sa sato minsan ngani “mantang kita mga parakasala pa,” asin ikapaheheling niato an satong personal na pagpasalamat paagi sa pagselebrar kan Memorial kan saiyang kagadanan asin paagi sa pag-imbitar sa iba na magin presente kaiba niato sa pinakaimportanteng okasyon na iyan.—Roma 5:8.
4 An Pinakaimportanteng Okasyon: Sa pangenot itinatampok kan pagselebrar kan kagadanan ni Cristo na sinorog nia nin daing depekto an soberaniya nin Dios. Ipinagigirumdom man kaiyan sa sato na puede kitang magkaigwa nin malinig na kamugtakan sa atubangan ni Jehova paagi sa pagtubod sa atang ni Jesus, sa siring sinisierto an kaligtasan niato. (Gibo 4:12) Totoo nanggad, ini an pinakaimportanteng okasyon kan taon!
5 An pagkamoot sa satong mga kataed maheheling sa satong pag-imbitar sa sainda na selebraron an Pamanggihan nin Kagurangnan kaiba niato. An mga pakinabang sa pantubos bukas pa sagkod ngonyan sa minilyon na nakanonood kan nakalalabi sa gabos na halaga kaiyan. (Fil. 3:8) An mga nagtutubod sa atang ni Cristo puedeng magkamit kan marigon na paglaom na buhay na daing katapusan.—Juan 17:3.
6 An panahon kan Memorial nagtatao nin espesyal na mga oportunidad na ikapaheling niato an pagpahalaga sa nakalalabing marhay na dai na kutana maninigong kabootan nin Dios. Ini ekselenteng panahon na maigot na makikabtang sa paghuhulit kan maogmang bareta kan Kahadean nin Dios. Dakulang mga pakinabang an naghahalat sa gabos na mapagngayongayong naghohorophorop sa dai ikaladawan na daing bayad na balaog ni Jehova asin nag-aandam na magin presente sa selebrasyon kan taon na ini kan Pamanggihan nin Kagurangnan!