Hapot

◼ Anong mga pagmamaan an maninigong gibohon nin mga magurang kun an saindang menor de edad na mga aki nakikikabtang sa paglilingkod sa langtad?

An Kristianong mga magurang tamang iiniiba an saindang mga aki sa ministeryo sa langtad, na sinasanay sinda na ihiras sa iba an maogmang bareta kan Kahadean. Sa paggibo kaiyan, kinakaipuhan na bantayan na marhay an saindang mga aki huli sa posibleng mga peligro sa teritoryo, dawa sa “mas ligtas” na mga komunidad. Padakol nang padakol na aki an punteriya nin kadahasan asin pagmaltrato huli sa nagdadakol na kahanaban asin seksuwal na kabikoan sa “delikadong mga panahon” na ini na kinabubuhayan niato. (2 Tim. 3:​1-5) Maninigo na an mga magurang gumibo nin rasonableng mga pagmamaan tangani na protehiran an saindang sadit na mga aki sa mga mambibiktima sa sainda. Ano an puedeng gibohon?

An Biblia madonong na naghahatol na kita magin mapagmaan asin mag-antisipar tanganing makapangandam sa peligro. (Tal. 22:​3; Mat. 10:16) An katuyohan digdi bako na gumibo nin mga reglamento, alagad madonong para sa sarong magurang o ibang nasa edad na na ibanan an sarong aki kun naglilingkod sa langtad. Kun magkaibanan sa paghuhulit an duwang responsable nang hoben na parahayag, marahay na sa gabos na panahon naheheling sinda nin sarong magurang o ibang nasa edad na. Siempre, mantang nagdadakula an aki asin nagigin nang orog na responsable, puedeng magdesisyon an mga magurang kun baga sia dai nang gayo nangangaipo na direktang manmanan nin mga magurang.​—Helingon man an “Hapot” sa Nobyembre 1992 na An Satong Ministeryo sa Kahadean.

Madonong man na pirmeng magin mapagmangno sa seguridad mantang nagbibiahe sa auto asin mantang naglalakawlakaw. Paagi sa tamang mga pagmamaan parateng maeebitaran an mga aksidente asin an makaturotristeng mga pasan na kolog, mga gastos medikal, asin posibleng legal na mga paninimbagan sa paorog nang paorog na madaling magdemandang kinaban sa palibot niato.

Tama na an mga aki ‘mag-omaw kan ngaran ni Jehova.’ (Sal. 148:​12, 13) An saindang kawiliwiling mga tataramon asin marahay na ugale mantang nasa ministeryo sa langtad hinahangaan na marhay kan iba asin nagtataong onra ki Jehova. Mga magurang, tabangan nanggad nindo an saindong mga aki na regular na makikabtang sa pagbalangibog kan maogmang bareta mantang kamo pirmeng alisto man sa pagprotehir sa sainda sa ano man na posibleng yaon na mga peligro!