Arangon an Tabang ni Jehova
1 Itinudok ni Jesus sa isip kan saiyang mga disipulo an pangangaipo para sa bendisyon ni Jehova sa saindang ministeryo. (Mat. 9:37, 38) An satong odok sa pusong mga pamibi nin pag-omaw asin pagpasalamat kaiba an odok na mga kahagadan saka pagngayongayo nagpapaheling kan satong biyong pagsarig ki Jehova para sa saiyang tabang. (Fil. 4:6, 7) Sinasadol kita kan Kasuratan na padagos na mamibi kaiba “an gabos na porma nin pamibi asin pagngayongayo,” asin ini maaplikar sa satong mga pamibi may labot sa ministeryo.—Efe. 6:18.
2 Inoomaw niato si Jehova sa pamibi huli sa saiyang daing kapantay na mga kualidad asin nagibo. Inoomaw man niato sia bilang an Paratao kan maogmang bareta na ihinuhulit niato. Sia maninigong omawon niato huli ta sia sana an nagpapangyaring magin mapanggana an satong ministeryo.—Sal. 127:1.
3 An satong mga pamibi nin pagpasalamat nagpapahayag nin pagpahalaga sa pakasabot na itinao sa sato ni Jehova manongod sa saiyang kabotan asin katuyohan. Bako daw na sarong pribilehio na ihiras sa iba an mga katotoohan kan Kahadean? Pinasasalamatan niato si Jehova sa gabos na nagigibo niato sa ministeryo.—Sal. 107:8; Efe. 5:20.
4 Tamang-tama nanggad, hinahagad niato ki Jehova an tabang sa paghanap sa mga tawo na maako kan satong alok na pag-adal sa Biblia, asin hinahagad niato an tabang sa pakaabot kan katotoohan sa saindang puso. Paagi sa siring na mga kahagadan, inaadmitir niato na solamente an Dios an makapangyayaring magin mabunga an satong gibohon sa ministeryo.—1 Cor. 3:5-7.
5 Naghona an sarong tugang na babae na dai binabasa nin sarong babae sa saiyang ruta sa magasin An Torrengbantayan asin Awake! Huling habong masayang an mahalagang marhay na mga magasin na ini, hinagad nia ki Jehova na kun dai iyan binabasa kan babae, sayumahan nia iyan. Kan sumunod na pagdalaw kan tugang na babae, an agom kan babae nagsabi: “Salamat sa paghatod mo kan mga magasin na ini nin regular. Binabasa ko iyan asin talagang nagugustohan ko iyan.”
6 Paagi sa mapakumbaba asin odok na pakimaherak, puede kitang magngayongayo ki Jehova na tabangan kitang atubangon an pagkaindiperente saka pag-olog-olog kan publiko asin paglabanan an ano man na takot sa tawo tanganing makapadagos sa mapusong paghuhulit sa iba. (Gibo 4:31) Kun padagos kitang mamimibi kaiba “an gabos na porma nin pamibi asin pagngayongayo” mantang makinuyog niatong pinagmamaigotan na magibo an satong sagradong paglilingkod, makakokompiar kita sa tabang ni Jehova.—1 Juan 3:22.