Mga Hapot

◼ Angay daw na mag-upak kun ipinapaisi an pakabalik?

Huli sa saiyang mamomoton na kabootan, itinao ni Jehova Dios an sarong Makakasuratan na paagi para sa nagsosolsol na mga nagkasala na magkamit giraray kan saiyang pabor asin makabalik sa Kristianong kongregasyon. (Sal. 51:​12, 17) Kun mangyari ini, ineenkaminar kita na patunayan an satong pagkamoot sa siring na sinserong mga nagsosolsol.​—2 Cor. 2:​6-8.

Dawa siring, minsan kita naggagayagaya kun makabalik na an sarong paryente o kamidbid, maninigo na mangibabaw an toninong na dignidad sa panahon na ipinapaisi sa kongregasyon an pakabalik nin saro. An Torrengbantayan na Oktubre 1, 1998, pahina 17, ipinahayag iyan nin siring kaini: “Minsan siring, dapat na girumdomon niato na an kadaklan sa kongregasyon dai nakaaaram kan partikular na mga pangyayari na nagbunga kan pagpahale sa saro o sa saiyang pakabalik. Dugang pa, tibaad may nagkapira na personal na naapektaran o nakolgan​—tibaad panhaloyan pa ngani​—kan salang ginibo kan nagsosolsol. Kun siring, huling mapagrisa sa iba sa siring na mga bagay, kun may paisi nin pakabalik, natural sana na dai nguna kita magpahayag nin maogmang pag-ako sagkod na iyan magigibo na nin personal.”

Minsan ngani naoogma kitang marhay na maheling an saro na makabalik sa katotoohan, bakong angay an pag-upak sa panahon kan saiyang pakabalik.

◼ Huli sa satong sinimplipikar na areglo nin pagdistribwir kan mga babasahon, anong mga pagliliwat an puede niatong gibohon kun iinaalok an mga babasahon sa paghuhulit sa tinampo?

Sa paghuhulit sa tinampo, angay na dolokon an mga tawo na kapot niato an mga magasin o publikasyon. Minsan siring, habo niatong daing pakundangan na itao an mga babasahon minsan kiisay na sanang tawo na maako kaiyan. An satong pasohan iyo na maninigo na pagmaigotan na makaolay an mga tawo. Paagi kaiyan madedeterminaran niato kun baga interesado an saro asin sia maoyon na basahon an satong mga publikasyon. Tibaad posible man na ipaliwanag na an satong paghuhulit ginigibo nin mga boluntaryo asin bakong negosyo, alagad iyan sinusuportaran nin boluntaryong mga kontribusyon sa bilog na kinaban.

Minsan siring, an kadaklan sa mga nanunuparan niato sa mga tinampo naghihidale asin kun siring masakit para sa sato na marisa an saindang interes. Sa siring na mga kamugtakan, tibaad mas marahay na mag-alok na sana nin pulyeto tangani na paorogon an saindang apetito para sa dugang pa niatong mga babasahon sa ngapit.

Kun kita danay na naghuhulit sa tinampo sa sarong lugar, mamimidbid kita nin mga tawo asin ini puedeng magbukas kan dalan para sa pag-orolay, na magtatao sa sato nin igong panahon na madeterminaran an saindang interes.