‘Dai Kita Puedeng Mag-ontok sa Pagtaram’
1 Maingat na sinusubaybayan ni Jesu-Cristo an paghuhulit. (Mat. 28:20; Mar. 13:10) Minsan ngani igwa nin haros anom na milyon na aktibong parabalangibog na nagpapatotoo sa 234 kadagaan, dai niato dapat ipamugtak na tapos na an satong paghuhulit. Sagkod na sabihon nin Dios na tapos na an gibohon, ‘dai kita puedeng mag-ontok sa pagtaram’ dapit sa mga bagay na nanodan niato.—Gibo 4:20.
2 Manarig sa Espiritu nin Dios: Si Satanas naggagamit nin grabeng pangigipit tangani na paluyahon an boot niato. (Kap. 12:17) An sato mismong bakong sangkap na laman pinasasakitan man kita nin dakol na problema. An siring na mga bagay puedeng irayo an satong atension sa pinakaimportanteng paghuhulit. Minsan siring, kun kita nagtitiwala ki Jehova, tatabangan kita kan saiyang espiritu na atubangon an ano man na balakid.
3 Kan an Kristianong kongregasyon kan enot na siglo makuring pinaglalamag, namibi an mga tugang sa Dios para sa tabang na logod padagos nindang itaram an saiyang tataramon sa bilog na pagkapusoan. Sinimbag ni Jehova an saindang pamibi, na ibinububo sa sainda an saiyang espiritu asin itinatao sa sainda an kaigotan asin determinasyon na kaipuhan tangani na padagos na makapaghulit. Bilang resulta, sinda nagpadagos na dai nin ontok na pusoan na ipinahahayag an maogmang bareta.—Gibo 4:29, 31; 5:42.
4 Dai Matakot sa Nakapaluluya sa Boot na Orolay: An pankagabsan na opinyon o mapagbalobaging publisidad tibaad may tendensiang patakoton kita. Minsan siring, girumdoma an pusoan na pahayag ni Pedro asin kan iba pang apostol sa Sanhedrin, na nasusurat sa Gibo 5:29-32. Bilang paratokdo sa Ley inadmitir ni Gamaliel na an gibohon nin Dios dai madadaog. Iyan dai nahahaman paagi sa satong kosog. An dakulang gibohon na ini suportado nin Dios, asin sia sana an makahahaman kaiyan!—Zac. 4:6.
5 Aroaldaw kitang makimaherak ki Jehova para sa saiyang espiritu na logod tabangan kita na maigot na ibalangibog an maogmang bareta. Logod na sabihon niato, siring ki Jeremias, na an mensahe kan Kahadean siring sa naglalaad na kalayo sa satong mga tolang. (Jer. 20:9) Dai kita puedeng mapasilensio!