Hapot
◼ Kun may mga ipinapasyar sa Bethel, ano an maninigong girumdomon kun manongod sa gubing asin pag-alinyar?
Sa pagpaliwanag kan importansia nin angay na gubing asin pag-alinyar, an Organized to Accomplish Our Ministry nagkokomento manongod sa pangangaipo nin pisikal na kalinigan, mabining gubing, asin marahay na pag-alinyar kun nasa ministeryo sa langtad patin kun nag-aatender sa Kristianong mga pagtiripon. Dangan, sa pahina 131, parapo 2, iyan nagsasabi: “Aplikado man iyan kun nagdadalaw sa erokan na Bethel sa Brooklyn o sa arin man na mga sangang opisina kan Sosyedad. Girumdomon na an ngaran na Bethel nangangahulogan ‘Harong nin Dios,’ kaya an satong gubing, pag-alinyar asin gawe-gawe maninigong magin pareho sa linalaoman sa sato kun nag-aatender sa mga pagtiripon para sa pagsamba sa Kingdom Hall.”
Minsan ngani an mayoriya kan mga tugang na nagdadalaw sa Bethel naggugubing nin angay, naobserbaran na an nagkapirang tugang na lalaki asin babae may tendensia pa man giraray na magin sobra kaimpormal sa saindang gubing kun nasa solar kan Bethel. Sa bagay na ini, siring sa gabos na iba pang aspekto kan satong Kristianong pamumuhay, boot niatong papagdanayon an kaparehong halangkaw na mga pamantayan na isinisiblag kita sa daan na kinaban. Kaya kun nagdadalaw sa Bethel, hapota an saindong sadiri: ‘Mabini daw an sakong gubing asin pag-alinyar? Iyan daw nagrereplektar nin marahay sa Dios na sakong sinasamba? Mauuyam daw an iba sa sakong itsura? Ako daw nagtatao nin tamang halimbawa para sa iba na nagpapasyar kaiba mi sa Bethel, na tibaad primero pa sana ninda?’
Nariparo na an mayoriya kan mga nagpapasyar sa Bethel na bakong angay an gubing mga inaadalan sa Biblia o interesado. Sa siring, bago imbitaran an mga ini sa Bethel, mahalagang marhay na ipaliwanag niato sa sainda nin patienot an mga pamantayan sa Bethel dapit sa gubing asin pag-alinyar tangani na sinda makapag-andam asin maggubing nin angay. Minsan ngani tibaad nag-aalangan kitang gibohon ini, iyan tunay nanggad na mas mamomoton kisa mapasupog sinda huli sa pagduman sa Bethel na bakong angay an gubing.
Logod na kita, siring man an mga inaadalan niato, paagi sa satong gubing asin pag-alinyar pirmeng ‘magsamno sa katokdoan kan satong Paraligtas, an Dios, sa gabos na bagay.’—Tito 2:10.