Bareta Dapit sa Konstruksion sa Bethel
1 Aram mi na kamo gabos interesadong maaraman an progreso kan konstruksion na ginigibo sa Bethel asin kun siring naoogma kaming itao sa saindo an pinakahuring bareta. Yaon sa ibaba an sarong sadit na representasyon kan mga edipisyo sa Bethel na ipinaheheling kun ano an magigin kamugtakan kaiyan kun tapos na an gabos na konstruksion.
2 Pinonan an trabaho kan Marso 1999 asin sagkod ngonyan an minasunod na mga proyekto tapos na: Nainstalar na an sarong bagong planta para sa treatment kan nagamit nang tubig; nakagibo na nin sarong bagong deep well; nagibo na an sarong bagong 240,000 na litrong tangke nin tubig; nakatogdok na an sarong bagong Literature Reception; nagibo na an bagong mga paradahan asin agihan na may atop. An kadaklan sa mga proyektong ini natapos bago itinogdok an bagong dormitoryo na may sampulong eskalon.
3 An nasa luwas na estruktura kan dormitoryo na may sampulong eskalon itinogdok nin sarong kontratistang taga luwas. Pinonan iyan kan Nobyembre 1999 asin natapos kan Oktubre 2000. Kaya natapos an kontrata na mayo pang sarong taon. An pagtapos kan nasa laog kan edipisyo, kabale an gabos na instalasyon kan mga tubo, koryente, asin air-conditioning, ginigibo kan sato mismong mga tugang. Sa presente igwa nin 18 Internasyonal na Lingkod hale sa 10 laen-laen na nasyon na naglilingkod sa satong proyekto. Kaibanan ninda an 40 bilog na panahon na lokal na boluntaryo asin 9 na trabahador sa Bethel.
4 Sa pagtogdok kan edipisyong ini na may sampulong eskalon, 4,254 metro-kubiko nin semento an nagamit. Kun an sementong ini iginibo nin sarong tinampo na tres metros an lakbang asin 150 milimetros an hibog, an kalabaan kaiyan haros sampulong kilometro! Dugang pa, may total na 775 tonelada nin kabilya asin 42 na tonelada nin batbat na pan-estruktura an nagamit sa edipisyo. An gabos na muebles sa 130 kuarto ginigibo kan sato mismong mga tugang sa satong sadiring karpinteriya.
5 Para sa ano gagamiton an bagong dormitoryo? Iyan magkakaigwa nin 130 kuarto kan Bethel, kaya maiistaran iyan nin 260 trabahador sa Bethel. Dugang pa, an impirmarya kan Bethel, labahan, kuarto sa klase kan Paadalan sa Ministeryal na Pagsasanay, libreriya, asin nagkapira na iba pang opisina ibabalyo sa bagong edipisyo. Pakatapos kaini, padadakulaon an kusina asin komedor sa dating dormitoryo tangani na magkaigo an sagkod sa 600 katawo. Sa siring, dawa ngani an bagong dormitoryo linalaoman na matapos pag-abot kan Oktubre, 2001, tibaad mangangaipo nin saro pang taon tangani na magibo an kadakol na paghirahay sa enot na dormitoryo.
6 Boot ming pasalamatan kamo gabos sa pinansial na mga kontribusyon na padagos nindong itinatao para sa proyektong ini. Mantang posibleng magpadagos iyan sagkod sa taon 2002, dinadagka niamo kamo na padagos na ipadara an saindong boluntaryong suporta sagkod na matapos an proyekto. Tabi padagos man na mamibi para sa bendisyon ni Jehova sa proyekto, huling kun mayo kaini iyan magigin basang sana.—Sal. 127:1.