An Iba Nagsasarig Saindo
1 “An mata dai makasasabi sa kamot: ‘Dai taka kaipuhan.’” Kun dai, ano an maprotehir sa mata sa peligro? Sa siring ginamit ni apostol Pablo an hawak nin tawo na may manlaenlaen na kabtang tangani na iilustrar an katunayan na kita gabos nagsasarig sa lambang saro sa kongregasyon. Isinurat pa ngani nia na “kaipuhan an mga kabtang nin hawak na garo baga mas maluya.” Iyo, kita nagsasarig sa iba asin an iba nagsasarig sa sato, na igwa nin “pararehong pangataman sa lambang saro” huli ta “kita mga miembro na kabtang kan lambang saro.” (1 Cor. 12:21-27; Efe. 4:25) Isipon an nagkapira sa mga paagi na nakakaapektar sa iba an ginigibo nindo.
2 Sa Pamilya: An mga mag-agom nagpapakinosogan paagi sa pagtubod, determinasyon, asin kaigotan na ipinaheheling ninda, na pinagdadanay na nasa enotan an saindang espirituwal na mga pasohan. Kaagid kaiyan, an aktitud asin halimbawa nin mga magurang puedeng magkaigwa nin dakulang impluwensia sa kun paano minamansay asin nakikikabtang an saindang mga aki sa ministeryo asin Kristianong mga pagtiripon.—Jos. 24:15.
3 Sa Ministeryo: An entusiasmo nindo sa paghuhulit kan maogmang bareta kan Kahadean nakaeenkaminar sa mga kapwa parahayag na maghingoa sa ministeryo. Dakulang bagay an halimbawa nindo, siring man an personal na tabang na itinatao nindo sa iba tangani na makapakikabtang sa paglilingkod. (2 Tes. 3:9) Tunay nanggad na inaapresyar nin mga payunir an ano man na pakiibaiba na ikatatao nindo sa sainda sa saindang ministeryo. Siempre, an mga interesado na nakakaolay nindo sa langtad naglalaom na kamo mabuelta asin tatabangan sinda na manompongan an dalan pasiring sa buhay. Habo nindong masudyaanan sinda.
4 Sa Kongregasyon: An pag-atender asin pakikikabtang nindo sa mga pagtiripon kan kongregasyon sarong gikanan nin tunay na pamparigon sa boot sa saindong mga tugang na lalaki asin babae. Kun kamo nagpapalta, bako sana kamo an dai nakikinabang. Dai makakamtan kan iba an pakinabang na itinatao kan presensia nindo sa mga pagtiripon. Daing duwa-duwa na an kamagurangan nagsasarig saindo, kun paanong kamo man nagsasarig sainda. An positibong aktitud asin gikan sa boot na suporta nindo nakakokontribwir sa saindang gibohon na pagpastor sa aripompon.
5 Paagi sa tataramon asin gibo, ‘konsideraron niato an lambang saro sa pagkamoot asin sa marahay na mga gibo.’ (Heb. 10:24) Bebendisyonan kita ni Jehova huli sa satong pagigin masasarigan asin pagigin fiel.