Magsarig ki Jehova Para sa Kosog
1 Huli sa dakol na dahelan, kaipuhan niatong magsarig ki Jehova. An paghuhulit kan maogmang bareta “sa bilog na ineerokan na daga” masakit na asignasyon. (Mat. 24:14) Daing ontok kita na nakikipaglaban sa satong bakong sangkap na laman. (Roma 7:21-23) Apuera dian, “kita nakikipaglaban . . . tumang sa [nakalalabi sa tawo na] mga namamahala sa kinaban sa kadikloman na ini.” (Efe. 6:11, 12) Malinaw nanggad na kaipuhan niato nin tabang. Paano kita makakukua nin kosog hale ki Jehova?
2 Paagi sa Pamibi: Sueltong itinatao ni Jehova an saiyang makapangyarihan na banal na espiritu sa mga lingkod nia na naghahagad kaiyan. (Luc. 11:13) Dai daw kamo nin kompiansa sa abilidad nindo na maghulit sa harong-harong, sa tinampo, o paagi sa telepono? Kamo daw nasusupog na maghulit nin impormal? An pagkaindiperente daw kan mga tawo sa teritoryo nakaina sa kaigotan nindo? Kumusta kun kamo pinipirit na ikompromiso an saindong pagtubod o integridad? Magsarig ki Jehova. Mamibi para sa kosog.— Fil. 4:13.
3 Paagi sa Personal na Pag-adal: Kun paanong kita nakakukua nin kosog paagi sa pagkakan nin materyal na kakanon, kita napasasarig man sa espirituwal paagi sa pagkakan nin regular sa Tataramon nin Dios asin sa mga publikasyon kan “fiel asin may diskresion na oripon.” (Mat. 4:4; 24:45) Kan hapoton kun ano an nagtao nin kosog sa saiya tangani na matagalan an dakol na taon na pagkainkomunikado sa Tsina na mayo nin Biblia, nagsabi si Stanley Jones: “Makapaninindogan kita nin marigon sa pagtubod. Siempre, kaipuhan nguna niatong mag-adal. Mayo kita nin panlaog na kosog kun dai kita mag-aadal.”
4 Paagi sa Pag-atender sa mga Pagtiripon: Sa sarong Kristianong pagtiripon kan enot na siglo, si Judas asin Silas “nagparigon sa boot kan mga tugang paagi sa balakid na diskurso asin nagpakosog sa sainda.” (Gibo 15:32) Siring man ngonyan, an nadadangog niato sa mga pagtiripon pinarararom an pag-apresyar niato ki Jehova, pinatatalubo an pagtubod niato, asin inaanimar kita para sa ministeryo. Pinangyayari kan mga pagtiripon na regular niatong makaolay an ‘mga kapwa trabahador para sa kahadean nin Dios,’ na iyo an “tabang na nagpapakosog” sa sato.—Col. 4:11.
5 Kaipuhan niato nin tabang sa “delikadong mga panahon [na ini] na masakit pakibagayan.” (2 Tim. 3:1) May labot sa mga nagkukua nin kosog hale ki Jehova, sinisierto sa sato: “Sinda maralayog na may mga pakpak na siring sa agila. Sinda madaralagan asin dai makakapoy; sinda maralakaw asin dai magkakaparagal.”—Isa. 40:31.