Mga Magurang—Sanayon an mga Aki Nindo na Maghulit
1 An satong mga kongregasyon binendisyonan nin dakol na aki na igwa nin sinserong pagmawot na maglingkod sa Dios. (Ecl. 12:1) Kaiba sinda sa mga inimbitaran ni Jehova na makikabtang sa pag-omaw sa saiya. (Sal. 148:12-14) Huli kaini, an aroaldaw na pagsasanay na itinatao nin mga magurang sa mga aki ninda maninigong kaiba an pagtotokdo kun paano makikikabtang sa paghuhulit kan Kahadean.—Deut. 6:6, 7.
2 Sanayon an mga Aki Paagi sa Progresibong mga Tangga: An mga aki maninigong sanayon mantang aki pang marhay na umiba sa mga magurang ninda sa ministeryo. Bago maglingkod, andamon an mga aki nindo na makikabtang sa pag-atubang. Determinaran nin patienot kun ano an linalaoman nindong gibohon ninda sa pinto. An mga aki pang marhay puedeng magtao nin mga pulyeto asin handbill patin mag-imbitar sa mga tawo na dumuman sa Kingdom Hall. An mga matibay nang bumasa puedeng magbasa nin mga teksto sa pinto. Puede sindang mag-alok nin mga magasin, na naggagamit nin halipot na pag-atubang. Mantang nagkakaeksperyensia sinda, sanayon sinda na gamiton an Biblia sa pag-atubang ninda. Dakol na aki an nakapoon na nin sadiri nindang ruta sa magasin asin regular na nagdadalaw liwat. Pinakamarahay sa aki na maghulit kaiba nin sarong nasa edad na imbes na kaiba nin saro man na aki. Puedeng ipaliwanag kan nasa edad na na an aki sinasanay sa ministeryo.
3 An sarong aking babae naghagad nin tabang sa kamagurangan tangani na sia makualipikar bilang parahayag kan Kahadean. Dawa ngani sia limang taon pa sana kan panahon na idto asin dai pa tataong bumasa, kaya na niang iatubang nin epektibo an mensahe sa mga pinto. Tinutuom nia kun saen manonompongan an mga teksto, binubuksan iyan, ipinababasa iyan sa kagharong, dangan ipinaliliwanag nia.
4 Maninigo man na itokdo sa mga aki paagi sa halimbawa nin mga magurang an kahalagahan nin pagkaigwa nin marahay na iskedyul nin regular na pakikikabtang sa ministeryo. Kaipuhan na establisaron nin mga magurang an dayaday na semanal na rutina sa paglilingkod asin magdanay dian, tanganing maaraman kan mga aki kun anong kabtang kan semana an pirmeng itinatagama para sa paghuhulit.
5 Kun sinasanay an mga aki mantang aki pang marhay na ikaogma an ministeryo, sinda mamomotibar na pag-aaboton an mas dakulang mga pribilehio sa ngapit, na tibaad kabale an paglilingkod bilang payunir. (1 Cor. 15:58) Kita gabos maninigong enkaminaron an mga aki sa tahaw niato na gumibo nin marahay na pag-oswag bilang mga paraomaw ki Jehova.