Iinaan an mga Suskripsion

Ikinaoogmang ipaaram sa saindo kan sangang opisina na inaprobaran kan Namamahalang Grupo an pag-ina kan mga suskripsion na inaasikaso kan mga sanga sa bilog na kinaban. Siring kan ipinaliwanag sa surat niamo sa gabos na kongregasyon na may petsang Enero 1, 2002, poon ngonyan limitado na sanang kabilangan nin mga suskripsion an aasikasohon kan sangang opisina, huli sa halangkaw na gastos nin pagpadara nin indibiduwal na mga kopya kan mga magasin paagi sa koreo. An presenteng mga suskripsion magpapadagos sagkod na matapos.

An gabos na tugang, siring man an interesadong mga tawo na konektado sa lokal na kongregasyon, maninigong resibihon ngonyan an saindang personal na mga kopya hale sa suplay na magasin kan kongregasyon asin bakong paagi sa suskripsion. Huli kaini, maninigong seguradohon kan gabos na kongregasyon na sinda nakakaresibi nin igong magasin tangani na an gabos na gustong kumua makakua nin mga magasin. Kun para sa publiko, ineenkaminar niamo an mga parahayag na irekord an mga nagmamawot na makaresibi nin regular kan satong mga magasin asin darahon ini nin personal. Pangyayarihon kaini na pirme nindang makaolay an mga indibiduwal na ini, na puedeng magresulta sa mas dakol na pag-adal sa Biblia.

Sa nagkapirang pambihirang kaso, an nagkapirang interesado nag-eerok sa puerang marhay na mga lugar na masakit aboton, o may post office box na pinadadarahan nin surat. Padagos na mapadara nin personal na mga suskripsion an sangang opisina sa siring na mga indibiduwal. An mga ini maninigong kadikiton sana, sa siring maresulta sa darudakulang matitipid sa gastos sa pagpadara paagi sa koreo asin sa kakaipuhanon na tawohan sa opisina na maasikaso kan dating areglo sa suskripsion.