An Paghuhulit kan Kahadean Nakatatabang na Magligtas nin Buhay!
1 Iyan an pinakamahalagang gibohon na nangyayari sa kinaban sa panahon na ini. Si Jehova Dios, si Jesu-Cristo, asin an manampulong ribong anghel ipinokus an saindang atension dian. Ano daw iyan, asin taano ta mahalagang marhay iyan? Iyan an paghuhulit kan Kahadean, asin iyan nakakatabang na magligtas nin buhay!—Roma 1:16; 10:13, 14.
2 May mga tawo na tibaad naniniwala na mas matatabangan niato an iba kun kita magmamaigot na paoswagon an kinaban na nasa palibot niato. Dakol an nababangkag sa mga paghihingoa na makamtan an katoninongan, bolongon an mga helang, o paoswagon an pagbuhay. Alagad ano an pinakamakatatabang sa mga tawo?
3 Sarong Nakalalabing Gibohon: An mensahe kan Kahadean sana an nagpapaliwanag kan katuyohan sa buhay, kan dahelan kan pagdusa nin tawo, asin kan solamenteng masasarigan na paglaom para sa ngapit. An maogmang bareta nagpapangyari sa mga tawo na magin katood ni Jehova asin sa siring mag-ako kan “katoninongan nin Dios na minalampas sa gabos na kaisipan.” (Fil. 4:7) Solamente an mensahe kan Kahadean an nagtatao nin praktikal na giya tangani na matabangan an mga tawo na atubangon an mga problema sa buhay ngonyan asin iyan nagpapaliwanag kun paano maliligtas na buhay kun laglagon na an maraot na kinaban sa ngapit. (1 Juan 2:17) Bako daw na bakong sayang an bilog na paghihingoa na ikatatao niato sa paghuhulit kan Kahadean?
4 Sa pag-ilustrar: Ano an pinakamarahay na paagi na matabangan an mga residente sa sarong baryo na tororog na namemeligro sa sarong sagop na madali nang mabulwang? Maglimas nin tubig sa likod kan matapo nang sagop? Pagayonon an seguradong malalaglag na baryo? Dai! Dapat na pukawon an mga residente sa baryo, patanidan manongod sa nagdadangadang na kalamidad, asin tabangan na dumulag! An mga torog sa espirituwal ngonyan namemeligrong marhay. (Luc. 21:34-36) Mantang an sistemang ini nin mga bagay madali nang lumihis, maghingoa kita na maghulit sa gabos na may pagkaapuradong marhay sa bilog na makakaya niato!—2 Tim. 4:2; 2 Ped. 3:11, 12.
5 Magdanay Dian: Hanapon niato an mga paagi na mapaabotan kan maogmang bareta an dakol pang tawo na sinsero—sa saindang mga harong, sa tinampo, sa telepono, asin sa impormal na paagi. An gibohon na itinao sa sato ni Jehova iyo an pinakamahalagang trabaho na posibleng magigibo niato. Kun gigibohon niato iyan nin maigot, ‘ililigtas niato an sato man sana sagkod idtong naghihinanyog sa sato.’—1 Tim. 4:16.