Ipaaram an Katotoohan Manongod ki Jesus
1 An linahidan na mga Kristiano, na tinatabangan kan kairiba nindang ibang karnero, “igwa kan gibohon nin pagpatotoo ki Jesus.” (Kap. 12:17) Ini mahalagang asignasyon, huling posible sana an kaligtasan paagi sa saiya.—Juan 17:3; Gibo 4:12.
2 ‘An Dalan, an Katotoohan, Patin an Buhay’: “Ako iyo an dalan asin an katotoohan patin an buhay,” an sabi ni Jesus. “Mayo nin makaduduman sa Ama kun bakong huli sa sako.” (Juan 14:6) Solamente paagi ki Jesus, “an dalan,” na kita makakadolok sa Dios sa pamibi asin magkakaigwa nin inooyonan na relasyon sa Saiya. (Juan 15:16) Si Jesus “an katotoohan” sa dahelan na an mga hula asin ipinanganganino na yaon sa Hebreong Kasuratan nagkatotoo sa saiya. (Juan 1:17; Col. 2:16, 17) Sa katunayan, an pangenot na katuyohan kan totoong hula iyo na tawan nin liwanag an saiyang prinsipal na kabtang sa pagkaotob kan katuyohan nin Dios. (Kap. 19:10) Dugang pa, si Jesus “an buhay.” Tangani na magkamit kan bendisyon na buhay na daing katapusan, an gabos dapat na maggibo nin pagtubod sa saiyang atang na pantubos.—Juan 3:16, 36; Heb. 2:9.
3 Payo Asin Nagrereynar na Hade: Dapat man na rekonoseron nin mga tawo an mahiwason na autoridad nin kapamahalaan na ipinaniwala ni Jehova sa saiyang Aki. Si Jesus pinatukaw na bilang Hade sa Kahadean nin Dios—‘saiya an pagkuyog kan mga banwaan.’ (Gen. 49:10) Dugang pa, dinesignaran sia ni Jehova bilang Payo kan kongregasyon. (Efe. 1:22, 23) Kaipuhan na tabangan niato an mga inaadalan niato sa Biblia na masabotan kun paano ni Jesus dinidirehiran an kongregasyon asin ginagamit an “fiel asin may diskresion na oripon” sa pagtao nin espirituwal na “kakanon sa igong panahon.”—Mat. 24:45-47.
4 Maheherakon na Halangkaw na Saserdote: Huling nakaeksperyensia nin mga pagbalo asin pagdusa bilang tawo, si Jesus “makasusurog sa mga binabalo.” (Heb. 2:17, 18) Kanigoan kanakaoogma na maaraman nin bakong sangkap na mga tawo na si Jesus nakikidamay sa saindang mga kaluyahan asin maboot na nakikimaherak para sa sainda! (Roma 8:34) Basado sa atang ni Jesus asin paagi sa saiyang mga paglilingkod bilang Halangkaw na Saserdote, makakadolok kita ki Jehova na “may katalingkasan sa pagtaram” tanganing akoon an ‘tabang sa igong panahon.’—Heb. 4:15, 16.
5 An sato logod na mga paghihingoa na itokdo sa iba an katotoohan manongod ki Jesus magpahiro sa sainda na kuyogon asin paglingkodan sia kasaro niato.—Juan 14:15, 21.