“Sa Harong ni Jehova Magduruman Kita”
1 Nagsimbag si David na may pagkagalaga sa imbitasyon na: “Sa harong ni Jehova magduruman kita.” (Sal. 122:1) An “harong” ni Jehova kan panahon na idto iyo an lugar na pinagtitiriponan para sa mga gustong sumamba sa tunay na Dios. Ngonyan, an pambilog na kinaban na Kristianong kongregasyon an “harong” nin Dios, “sarong harigi asin sulay kan katotoohan.” (1 Tim. 3:15) Itinatao an gabos na probisyon para sa kaligtasan paagi sa pinakapaagihan na ini. Sa dahelan na iyan, “dian maburunyog an gabos na nasyon” kun mawot ninda na magkamit kan mga bendisyon kan Kahadean nin Dios.—Isa. 2:2.
2 An “harong” na ini kompuesto nin labing 94,000 na kongregasyon sa 234 nasyon. Bukas an pinto nin mga Kingdom Hall sa bilog na kinaban, na igwa nin labing sais milyon na maigot na trabahador na nagpapaabot kan imbitasyon na: “Madia! . . . An siisay man na boot kumua kan tubig nin buhay na daing bayad.” (Kap. 22:17) Ngonyan nabubuhay kita sa delikadong mga panahon, na marikas nang nagdadangadang an katapusan kan sistemang ini. Kaya kaipuhan na marhay na an mga tawo maghingoang ‘rumani sa Dios’ paagi sa orog na pagrani sa saiyang organisasyon. (Sant. 4:8) Paano niato sinda matatabangan?
3 Idirehir an Interes sa Organisasyon: Poon kan enot na makaolay niato an mga interesado, maninigo na idirehir niato an saindang atension sa organisasyon. Puede niatong ipaliwanag sa sainda na an gabos na nanodan niato naghale sa organisasyon, na pinapaagi sa grupong oripon na nagsusuplay nin “kakanon sa igong panahon.” (Mat. 24:45-47) Poon sa kapinonan, kaipuhan na marealisar nin mga bagohan na an kalabot sa dalisay na pagsamba bako sanang an lokal na kongregasyon; igwa nin sarong organisado, teokratiko, pambilog na kinaban na sosyedad na nagpupunsionar sa irarom kan pagdirehir ni Jehova.
4 Ipaaram sa mga interesado an adres kan lokal na Kingdom Hall saka an mga oras kan pagtiripon. Ipaliwanag an mga pagkakalaen kan satong mga pagtiripon asin kan relihiosong mga pagtiripon na tibaad naatenderan ninda kan nakaagi. Maogmang inaako an gabos, mayo nin pangongolekta o personal na paghagad nin pondo. Minsan ngani nombradong mga ministro an namamayo sa mga programa, gabos may oportunidad na magkomento asin magpartisipar sa mga kabtang kan programa. Maogmang inaako an mga pamilya; kaiba an mga aki sa mga pag-orolay niato sa Biblia. An Kingdom Hall simple asin mayo nin mga kandila, estatuwa, o imahen. Puede nindong ipaliwanag na an mga nag-aatender sa pangenot mga residente sa lokal na komunidad.
5 Progresibong Idirehir an Interes kan mga Inaadalan sa Biblia: Apuera sa pagtotokdo kan katotoohan sa Biblia, an pag-adal sa Biblia maninigo man na pataluboon sa inaadalan an pag-apresyar sa organisasyon ni Jehova asin tabangan sia na maheling an pangangaipo na magin kabtang kaiyan. Kan enot na siglo, tinipon kan mga disipulo ni Jesus an mga sinsero sa mga kongregasyon sa irarom nin sentral na namamahalang grupo. An mga asosyado pinakosog sa espirituwal, na nakatabang sa sainda na matagalan an kahorasaan. (Heb. 10:24, 25; 1 Ped. 5:8-10) Sa satong kaaldawan, katuyohan ni Jehova “na tiponon giraray an gabos dian ki Cristo.” (Efe. 1:9, 10) Bilang resulta, igwa kita nin pambilog na kinaban na “kasararoan nin mga tugang.”—1 Ped. 2:17.
6 Gumamit nin pirang minuto sa saindong inaadalan sa Biblia kada semana tangani na isaysay o iladawan an sarong bagay manongod sa organisasyon asin kun paano iyan nagpupunsionar. Makakukua kamo nin nakakatabang na materyales sa brosyur na Jehovah’s Witnesses—Who Are They? What Do They Believe? Tinotokar kan brosyur na ini an mayor na mga aspekto kan organisasyon asin kun paano dian makikinabang an inaadalan. Puede man kamong gumibo nin mga areglo kun posible na dalanon kan mga inaadalan an video na Jehovah’s Witnesses—The Organization Behind the Name. Kun bako kamong harayong marhay sa Bethel, puede nindong iareglo na ipasyar an mga inaadalan nindo, sa siring tinatabangan sinda na maheling mismo kun paano nagpupunsionar an organisasyon. An nagkapira nagin mapangganang marhay paagi sa pagtao sa mga inaadalan nin kopya kan 2003 Yearbook tangani na basahon, huli ta ini espesipikong nagtotokar kan kasaysayan kan gibohon sa Pilipinas. Igwa pa kami sa Bethel nin bastanteng suplay kaining Yearbook sa Cebuano, Iloko, Ingles, asin Tagalog, kaya ineenkaminar mi an kamagurangan na iareglo na pumedido nin nagkapira na magagamit kan mga tugang sa saindang mga inaadalan sa Biblia.
7 An pakamidbid sa iba pang mga Saksi makakatabang man na pahiwason an saindang ideya manongod sa organisasyon. Imbitaran an iba pang parahayag na umiba sa pag-adal sa panapanahon. Tibaad puede kamong ibanan nin sarong magurang sa kongregasyon tangani na makamidbid sia. Puedeng magin tunay na bendisyon an pag-areglo na dalawon kan paraataman sa sirkito o kan saiyang agom an inaadalan.
8 Enkaminaron an mga Bagohan na Umatender sa mga Pagtiripon: Kaipuhan na marealisar nin mga bagohan an importansia nin pag-atender sa mga pagtiripon. Probaran na animaron an interes ninda. Sabihon an mga artikulo na kokobrehan sa Pag-adal sa Torrengbantayan. Sambiton an titulo kan masunod na pampublikong pahayag. Isaysay an tampok na mga kabtang kan materyales na kokobrehan sa Teokratikong Paadalan sa Pagmiministro asin Pag-adal sa Libro kan Kongregasyon. Sabihon sa sainda kun gurano kamo nakikinabang na marhay sa pag-atender sa mga pagtiripon asin kun taano ta namamatean nindo an pangangaipo na umatender.
9 Kun talagang umatender sa pagtiripon an inaadalan sa Biblia, maogma siang akoon. Ipamidbid sia sa iba, kaiba an kamagurangan. Kun maatender sia sa pampublikong pahayag, ipamidbid sia sa ispiker. Ipasyar sia sa bilog na Kingdom Hall, ipaliwanag an katuyohan kan counter kan mga literatura asin magasin, mga kahon sa kontribusyon, libreriya, asin teksto kan taon. Ipaaram sa saiya na an tiriponan bako sanang sarong harong nin pagsamba kundi sentro man nin aktibidad para sa paghuhulit.
10 Ipaliwanag kun paano ginigibo an mga pagtiripon. Sabihon na an Biblia an satong prinsipal na librong pinag-aadalan asin na an mga publikasyon niato mga pantabang sa pag-adal sa Biblia. Ipaliwanag na an gabos na musika asin liriko sa satong songbook kinomponer kan mga Saksi ni Jehova tangani na gamiton sa satong pagsamba. Darahon an atension sa manlaenlaen na kamugtakan kan mga nag-aatender. Magkomento nin positibo manongod sa espiritu nin pagkamakikatood asin pagkamapag-istimar. An maboot na interes na ini puedeng saro sa pinakamakosog na dahelan na mapahiro an inaadalan na umatender giraray.
11 Kun Taano an Nagkapira ta Tibaad Napopogolan: Sa parate, sa ibong kan gabos na ginigibo nindo, nagduduwaduwa an nagkapira na mas maparani sa organisasyon. Dai tolos mawaran nin paglaom. Pagmaigotan na saboton an mga saboot ninda. Tibaad bako sindang tuod na umatender sa relihiosong mga seremonya apuera sana kun may espesyal na mga okasyon. Tibaad ginigipit sinda kan mga miembro kan pamilya o dayupot na mga katood. Tibaad natatakot sinda sa mga kataed ninda. Siring man, tibaad sibot sinda sa saindang materyal na mga pangangaipo o nadidisturbo sinda nin sosyal na mga okupasyon. Tibaad kaipuhan nindong tabangan sinda na magkaigwa nin tamang punto de vista asin “makasierto sa orog na mahalagang mga bagay.”—Fil. 1:10.
12 Magtao nin sono sa Kasuratan na mga dahelan na magmaigot. Idoon na kita gabos nagkakaipo nin pamparigon sa boot asin espirituwal na pagpapakosog na inaako niato sa satong pakikiasosyar. (Roma 1:11, 12) Liniwanag ni Jesus na an pagtumang nin pamilya bakong balidong dahelan na magpogol. (Mat. 10:34-39) Kaipuhan na kontrolon an personal na mga pinag-aaabot asin disturbo; ta kun dai iyan nagigin siod. (Luc. 21:34-36) An mga angay na mag-ako kan bendisyon ni Jehova kaipuhan na magin bilog na kalag, nungkang kulang nin kaigotan. (Col. 3:23, 24) An pagtadom nin pag-apresyar sa siring na mga prinsipyo sa Biblia puedeng magbukas kan dalan na sinda umoswag sa espirituwal.
13 Bukas an mga Pinto: An harong ni Jehova para sa tunay na pagsamba halangkawon sa gabos na iba pa. Ipinaaabot an imbitasyon sa 234 nasyon sa bilog na kinaban: “Madia, . . . tumukad kita sa bukid ni Jehova, . . . asin totokdoan nia kita manongod sa saiyang mga dalan, asin kita maglalakaw sa saiyang mga dana.” (Isa. 2:3) An positibong paghimate kan mga bagohan puedeng makasalbar kan buhay ninda. An pagdirehir kan interes ninda sa organisasyon ni Jehova saro sa pinakamarahay na paagi na matatabangan niato sinda.