Pagmantener kan Satong mga Kingdom Hall

1. Sa anong katuyohan nagseserbi an Kingdom Hall?

¹ An satong Kingdom Hall nagseserbing lokal na sentro nin dalisay na pagsamba sa komunidad. Minsan ngani simple asin sadit sana an mga edipisyong ini, alagad huling irinerepresentar kaiyan si Jehova saka an saiyang mga lingkod sa banwaan o barangay na kinamumugtakan kaiyan, kaipuhan na iyan namamantener na marhay asin na pirmeng malinig an palibot kaiyan.

2. Taano ta mahalaga na papagdanayon na malinig asin presentable an Kingdom Hall?

² Regular na Iskedyul nin Paglinig: An gibohon na pagmantener kan Kingdom Hall sarong mahalagang marhay na kabtang kan satong sagradong paglilingkod. An librong Organisado nagsasabi sa pahina 121: “Maninigo na ibilang na pribilehio kan mga kabilang sa kongregasyon an pinansial na pagsuportar sa Kingdom Hall asin pagboluntaryong tumabang na papagdanayon iyan na malinig, presentable, asin namamantener. Sa laog sagkod sa luwas, an Kingdom Hall maninigo na angay na magrepresentar sa organisasyon ni Jehova.” Siring kan mga panahon kan Biblia, an mga lingkod ni Jehova ngonyan maninigong magin mahigos sa “pagpakarhay asin paghirahay” kan satong lugar nin pagsamba.—2 Cron. 34:10.

3. Paano inoorganisar an paglinig sa Kingdom Hall asin sairisay an puedeng makikabtang sa pribilehiong ini?

³ Maninigong ipaskil sa information board an iskedyul para sa semanal na paglinig kan Kingdom Hall. An gabos na grupo sa pag-adal sa libro maninigong magsarosalida kada semana sa paglinig kan tiriponan, na sinusunod an sarong listahan nin mga dapat na gibohon. An gabos na may kakayahan kaipuhan na makikabtang sa semanal na pribilehio na pagpapadanay na malinig asin presentable kan Kingdom Hall. Sa paggiya nin mga magurang, puedeng iiba an mga aki, na paagi kaiyan tinotokdoan sinda na pahalagahan an pribilehiong ini. Nangorogna kun labi sa sarong kongregasyon an naggagamit nin sarong Kingdom Hall, kaipuhan an marahay na kooperasyon tanganing an pag-asikaso sa mahalagang aspektong ini kan satong pagsamba bakong paninimbagan nin pira sana.

4. Paano kinokoordinar an gibohon na pagmantener kan Kingdom Hall?

⁴ Pagmantener kan Kingdom Hall: An grupo nin kamagurangan an may paninimbagan na mangenot sa pagmantener kan Kingdom Hall. Kun saro sanang kongregasyon an naggagamit kan Kingdom Hall, sarong magurang sa kongregasyon o ministeryal na lingkod an nonombrahan na makoordinar kan gibohon. Sia an maorganisar kan aroaldaw na pag-asikaso kan Kingdom Hall, na sinesegurado na iyan napapagdanay na malinig asin nasa marahay na kamugtakan saka igwa nin supisyenteng mga suplay na magagamit. Kun duwa o labi pang kongregasyon an naggagamit nin sasarong tiriponan, manombra an mga grupo nin kamagurangan nin komite sa pag-asikaso kan Kingdom Hall na maorganisar kan mga areglo para sa pag-asikaso kan edipisyo asin propiedad. An komiteng ini nagpupunsionar sa paggiya kan mga grupo nin kamagurangan.

5. Ano an ginigibo kada taon asin durante kan pagsongko kan paraataman sa sirkito tanganing masegurado na an Kingdom Hall napapagdanay na nasa marahay na kamugtakan?

⁵ An detalyadong pag-inspeksion kan Kingdom Hall ginigibo sa bulan nin Setyembre kada taon. Dugang pa, an mga paraataman sa sirkito magibo nin report dapit sa kamugtakan kan Kingdom Hall durante kan saindang pagsongko asin matao sinda nin mga suhestion dapit sa mga bagay na nagkakaipo nin atension. Paninimbagan kan kamagurangan na gumibo nin mga areglo sa pag-asikaso nin lubos sa ano man na mga bagay na nagkakaipo nin atension. Puedeng imbitaran an mga parahayag na tumabang sa kinakaipuhan na mga paghirahay asin pagmantener. An gabos maninigong magin listo sa paghirahay sa dawa saradit na bagay asin maninigong asikasohon tolos an mga bagay na nagkakaipo nin atension.

6, 7. Paano nagkakaigwa nin pondo na magagamit para sa regular na pagmantener kan Kingdom Hall?

⁶ Pagtagama nin Pondo Para sa Pagmantener: An kadaklan na trabaho sa Kingdom Hall asin sa palibot kaiyan ginigibo nin mga boluntaryo. An saindang mapagsakripisyong mga paghihingoa sarong marahay na kapahayagan nin pagkamoot asin nakakatabang nin dakula sa pag-ina kan gastos. Minsan siring, kaipuhan an pondo para sa paghirahay asin mga kagamitan sa paglinig, saka para sa tubig patin kuryente na ginagamit. Kaya irinerekomendar na an kamagurangan magtagama nin kuarta kada bulan na magagamit kan komite sa pag-asikaso, o kan magurang sa kongregasyon o ministeryal na lingkod na inasignaran sa pagmantener kan tiriponan.

⁷ Kun labi sa sarong kongregasyon an naggagamit kan Kingdom Hall, magkakaigwa an komite sa pag-asikaso nin suhay na deposito sa bangko asin matao iyan nin bulanan na nasusurat na report sa pinansial sa kada grupo nin kamagurangan, sa siring pinapagdadanay na aram kan kamagurangan kun paano ginagasto an pondo. An kamagurangan an may paninimbagan sa tamang paggasto kan pondo kan kongregasyon.

8. Ano an maninigong gibohon kun kaipuhan an dakulang pagmantener o paghirahay?

⁸ Dakula an Kaipuhan na Pagmantener Asin Paghirahay: Kun maheling kan komite sa pag-asikaso na dakula an kaipuhan na paghirahay may koneksion sa pagmantener kan Kingdom Hall, sasabihon kan komite an bagay na iyan sa mga grupo nin kamagurangan para sa paggiya. Kun madeterminaran na dakula an kakaipuhanon na pagmantener o paghirahay, magibo an kamagurangan nin tamang kalkulasyon sa gastos asin maandam sinda nin sarong resolusyon para sa pag-aprobar kan kongregasyon. (Helingon an “Hapot” sa An Satong Ministeryo sa Kahadean na Pebrero 1994.) Dangan maninigo sindang sumurat sa sangang opisina para sa pag-aprobar. Sa saindang surat sa sangang opisina, maninigong sabihon kan kamagurangan kun ano an saindang rekomendasyon, kun gurano an magigin gastos kaiyan, asin kun guranong kuarta an yaon sa sainda. Dai maninigong ponan an ano man na dakulang paghirahay o pagdagdag sa edipisyo sagkod na dai pa nakakakua nin pag-aprobar hale sa sangang opisina.

9. Paano niato ikakapaheling an satong pagpapahalaga sa satong Kingdom Hall?

⁹ Dakula nanggad an pagpapahalaga niato sa satong pribilehio na iribang magtiripon sa Kingdom Hall! Gibohon niato gabos an satong kabtang paagi sa bilog na pusong pagtao kan satong kuarta asin suporta sa pagmantener kan satong lugar nin pagsamba.